Wikipesija:lipu tawa jan pali

o kama pona tawa lipu Wikipesija! ona li tawa jan ale. jan ale li ken pali lon ona. sina wile pali la, o lukin e ijo suli lon lipu ni.

o toki pona taso

lipu ale en toki lipu li wile e toki pona taso. o toki ala e toki Inli e toki ante. taso, sina ken ala toki pona e wile sina la, toki ante li ken lon tomo toki pi lipu jan.

Pages and talk on this wiki should be in toki pona only. Please don't use English or other languages. However, if you can't express what you want to say in toki pona, you may use other languages on user talk pages.

tomo toki

sina wile toki e ijo pi lipu Wikipesija la, tomo toki li lon.

lipu pi lipu wile

sina wile pali e lipu la, o lukin e lipu pi lipu wile. (sina pali e lipu la, o pana e nimi tawa pi lipu pi lon ala, tawa ni: nimi ona li kama lon lipu pi lipu wile.)

sina ante e lipu tan ma ante la, o pana e nimi pi lipu mama

sina ante toki e lipu tan lipu Wikipedia li pana e ona tawa lipu ni la, o pana e nimi tan lipu Wikipedia lon poki "ante li seme:".

taso, o pana ala e lipu tan lipu https://tokipona.fandom.com. tenpo kama la mi wile kama e lipu ale tan ona, li wile pana e toki ni tawa ona: "lipu Wikipesija li lon; o pana tawa ona, tawa ni ala." sina kama e lipu lon tenpo ni la, ken la jan li awen ante e lipu mama. ante ni li kama ala lon ni. kin la, sina kama jo e toki taso tan lipu ante li pana e ona tawa lipu ni, nimi pi jan pali li weka. ni li ike. mi kama e lipu la mi ken kepeken ilo. ilo ni li awen e nimi jan.

kipisi li lon

kipisi li sama ilo lili, li pali e ijo mute. toki ilo {{nimi ijo|musi Manka|Minecraft}} li kama musi Manka (Minecraft). o lukin e kipisi ale lon lipu ilo ni, anu o kepeken nena "o ante e toki ilo" tawa lukin pi kipisi ona.

ante toki pi ilo lipu

sina ken ante toki e ilo lipu li pana tawa ni: https://github.com/tbodt/mediawiki-tokipona

sina lukin e toki Inli lon ilo lipu, anu li pilin ike tan toki pona lon ilo lipu, la o toki tawa mi, anu o pana e ante tawa lipu mi lon ilo GitHub.