sina ante e wan pi lipu "jan Lejonato pi ma Winsi"

==nasin sona en ilo sin==
[[File:De divina proportione - Vigintisex Basium Planum Vacuum.jpg|thumb|right|sijelo pi nasin nanpa li jo e supa mute tu tu. supa ona luka luka luka tu wan li kepeken poka tu tu sama. supa ona luka tu wan li kepeken poka tu wan sama.]]
nasin sona la, jan Lejonato li lukin taso, li toki e sona tan, li sitelen e sona tan lukin. ona li alasa ala e sona kepeken ante pali pi kama sona anu toki pi kon ken. ona li sona ala e toki Lasina, e nasin nanpa tan tomo sona la, sona pi jan Lejonato li suli ala tawa jan sona lon tenpo ona. ona li kama sona e toki Lasina tan ona sama taso, li kama sona e nasin nanpa tan jan Luka Pasijoli (Luca Pacioli). ona li sitelen e sijelo pi nasin nanpa tawa lipu pi jan Luka. ona li kama sona e nasin suno lon nena Monte Losa (Monte Rosa). sona pi soweli pi tenpo pini suli li open la, toki sona ona li suli, li toki e kiwen pi soweli moli.
===sona pi sijelo jan===
[[File:Studies of the Arm showing the Movements made by the Biceps.jpg|thumb|left|sitelen sona pi [[kiwen insa]] luka]]
jan Lejonato li open e kama sona pi sijelo jan lon tenpo pi jan sona ona Welosijo (Verroccio). jan Welosijo li wile e ni: jan ona pi kama sona li kama sona mute e sijelo. selo en insa ala sijelo la, jan Lejonato li kama jan sona suli kepeken tenpo lili, li sitelen mute e ko sijelo pi wawa tawa, e ijo sijelo ante tawa lukin. 

jan Lejonato li kama jan musi suli la, ona li ken tu e sijelo tawa sona lon ma tomo Pilense, lon ma tomo Milan kin, lon ma tomo Loma kin. ona li pali e sitelen 240, li pana e nimi 13 000 tawa lipu sona. jan musi ante en jan sona ante li pana kin e sitelen e nimi tawa lipu ni. 

sitelen sijelo pi jan Lejonato li pana e kiwen sijelo, e ko insa pi wawa tawa. jan Lejonato li kama sona e kiwen sijelo ale, e wawa pi ko sijelo tawa. ona li sitelen e pilin, e nasin pi telo loje, e insa unpa, e insa ante. sijelo pi kama jan sin li lon insa sijelo la, ona li pana e sitelen sona lon tenpo open pi sitelen sona. sitelen ona en nimi ona li tawa jan sona la, ni li ken ante e nasin sona sijelo lon tenpo sama ni. taso ni li kama ala.

jan Lejonato li lukin mute e tenpo lon sijelo, e pilin lon sinpin. pilin ike pi wile utala li suli tawa ona. sijelo jan li ante mute, li kama ike jaki la, ona li sitelen mute e jan. ona li kama sona, li sitelen e sijelo pi soweli mute. ona li tu e sijelo mani, e sijelo waso, e sijelo pi soweli pi sama jan, e soweli suli wawa, e akesi ko, li lukin e sama ni pi sijelo jan.

jan Lejonato li tu e sijelo, li sitelen, li toki e ko sijelo tawa, e linja pilin, e nasin pi telo loje la, ni li pona tawa sona sijelo, li pona tawa sona pi nasin tawa. ona li wile sona e tan pilin, e nasin pilin. sona sijelo pi tenpo pimeja li toki e nasin sijelo tu tu taso la, ni li ken ala pona tawa sona sijelo pi jan Lejonato. ona li kama sona e ni: nasin sijelo ni tu tu li lon ala lawa jan, li lon ala pilin, li lon ala insa pi weka jaki. kama sona ona la, pilin li lawa e nasin pi telo loje lon sijelo. nasin pi telo loje li kama selo ike la, ona li kama jan sona nanpa open. insa pi weka jaki li jo ala e selo pona, li kama jo e selo ike la, ona li kama jan sona nanpa open kin. lupa li lon insa lawa la, ona li pali e sijelo sama kepeken ko pipi pi kasi suwi. lupa pi nasin suli li lon insa pilin la, ona li pali e sijelo sama kepeken kiwen lukin pi len ala. ni la, ona li pana e telo e lili pan lon ona. ona li kama sona e tawa ni la, ona li kama sona e tawa pi telo loje sijelo.
===sona pi nasin pali en ilo sin===
sona ilo pi jan Lejonato li pona kin tawa jan. ona li kama sona, li sitelen e ilo sama nasin pi sona sijelo, li sitelen e ilo sin. sitelen pi tenpo ni li pana e wan ilo ale lon poka ilo la, jan Lejonato li kama jan nanpa open tawa sitelen pi sama ni. sitelen ilo li lon lipu ona 5 000. ona li kama tan ma tomo Milan tawa ma tomo Wenesija (Venezia)la,ona li kama e ilo sin tawa ma tomo ni. ona li pali e sinpin awen pi tawa ken tawa utala. ona li sona sitelen e nasin sin tawa nasin telo suli. jan lawa Luwi nanpa luka luka tu (Louis XII) la, ona li nasin sitelen e nasin telo sin. lipu pi jan Lejonato li jo e ilo sin ken, e ilo sin nasa, e ilo sin pi ken ala. ilo ni li ilo pi kalama musi, li ilo jan utala, li ilo pi sewi pi telo anpa, li ilo tawa, li selo pi nasin sin tawa ilo alasa utala suli, li ilo alasa utala suli kepeken kon telo seli.

tawa waso li musi suli tawa jan Lejonato, li kama e sitelen mute ona pi tawa waso, e ilo pi tawa sewi kin. ilo wan ni li tawa sama luka waso. ilo ante li tawa kepeken lipu tawa lon nasin sike. sitelen tawa pi nimi ''ilo tan lawa pi jan Lejonato'' (Leonardo's Dream Machines) la, jan li pali e ilo tan sitelen ilo pi jan Lejonato. len pi awen sewi en ilo alasa utala wawa pi palisa tawa li kama tan ni. ilo mute ni li pali pona. ilo ante mute ni li pali pi pona ala.

jan Make Wanten Peke (Marc Van Den Broek) li lukin e ilo sin mute pi jan Lejonato. ilo sama li lon tenpo pini suli pi jan Lejonato. ni la, ilo pi jan Lejonato li ken tan ilo pi tenpo pini. jan Lejonato li sin e ilo sama ni: ona li wan e pali mute lon ilo wan, li namako e pali ilo, li pana e ilo tawa pali pona sin.

lipu pi jan Lejonato la, ona li toki e lawa pi supa tawa. lawa ni la, supa wan li tawa lon supa ante la, ni li pali, li kama e seli, li weka e wawa. lawa ni la, jan Lejonato li jan sona nanpa wan. ona li lukin e tawa pi pini ala. ona la, tawa ni li ken ala. taso ona li pana ala e sona tawa jan ante la, tenpo sike ale ale li pini la, jan Kijome Amonton (Guillaume Amontons) li kama sona sin e lawa ni.