jan Lejonato pi ma Winsi

tan lipu Wikipesija
Revision as of 2021-05-05T20:51:39 by Jan Ke Tami (toki | ante)
Jump to navigation Jump to search
Under construction icon-yellow.svg lipu ni li pini ala li wile e pali. sina ken pini e ona.
sona la, sitelen ni pi jan Lejonato li sitelen taso pi jan Lejonato tan tenpo ona li tan jan Panseko Mesi lon tenpo sike nanpa 1515-1518

jan Lejonato pi ma Winsi (toki Italija: Leonardo di ser Piero da Vinci) li kama sin lon tenpo sike nanpa 1452, li moli lon tenpo sike nanpa 1519. ona li jan pi sona mute. ona li jan sona pi nasin nanpa mute li jan sitelen li jan pi sona pali li jan pi nasin sona li jan pi insa lawa mute li jan pali pi musi kiwen li jan sona pi pali tomo. tenpo wan la jan mute li sona e pali ona tan sitelen kule ona. taso tenpo ni la jan mute li sona kin e ona tan lipu ona. lipu la ona li sitelen li toki e ijo mute. ijo ni li sona sijelo li sona mun li sona kasi li sona pi lipu ma li sona sitelen li sona soweli pi tenpo pini suli. jan Lejonato li sona e mute la ni li sama kon pona pi tenpo pi wile sama tenpo pini. pali ona li wawa li suli tawa tenpo pini ni. jan Mikelanselo taso li suli sama ni.

ona li kama sin tan mama tu pi wan nasin olin ala lon ma tomo Winsi anu lon pona ona. ona li kama sona lon ma tomo Pilense lon poka pi jan sona sitelen suli Anteja Tan Welosijo. ona li open e pali sina lon ma tomo ni. taso ona li pali mute tawa jan Lutowiko Sosa lon ma tomo Milan. tenpo la ona li pali lon ma Pilense li pali lon ma Milan kin. tenpo lili la ona li pali lon ma tomo Loma kin. ma Loma la jan mute li wile pali sama ona li kama sona tan ona. jan lawa Pansi nanpa wan li wile la ona li awen lon ma Kanse kepeken tenpo sike tu wan li moli. tenpo ni li pini la jan li awen toki e ona e sona ona e pali ona e nasin ona e pilin ona.

sona pi tenpo pini la, jan Lejonato li jan musi pi suli mute. pali mute ona li kama weka lon tenpo. pali suli ona pi mute lili li awen. taso sama la, sitelen awen ona li sitelen pi suli mute tawa ma pi poka suno pini. sitelen suli ona nanpa wan li sitelen pi jan Mona Lisa. jan li mute e sitelen la, sitelen pi moku nanpa pini li sitelen nanpa wan tawa sitelen pi nasin sewi. sitelen pi jan mije Wituwijano (Vitruvian) li suli kin tawa jan mute. tenpo sike nanpa 2017 la, sitelen pi jan pi awen pi ma ale (Salvator Mundi) li kama sitelen pi mani nanpa wan lon tenpo ale.

jan Lejonato li sona mute e ilo la, ona li sitelen e ilo pi tawa sewi, e tomo utala tawa, e ilo pi mute suno, e ilo pi sona nanpa, e selo tu pi tomo telo tawa. ilo ona lili li kama lon awen ona, li ken lon tenpo ona. ken ala ni li tan ni: nasin pi pali kiwen nasin pi sona pali li open taso lon tenpo ona. taso ilo lili ona li kama, li sama suli ala tawa jan mute. ona li kama sona e sin suli mute tawa sona pi sijelo jan, tawa nasin pi sona pali, tawa sona ma, tawa sona pi nasin suno, tawa sona pi supa tawa, tawa sona pi tawa telo. taso ona li pana ala e sona ni tawa jan la, ni li ante ala e nasin sona lon tenpo pini.

pali

sitelen kule

jan pi tenpo ni li sona mute e sona mute pi jan Lejonato. taso tenpo sike ale ale ale ale li pini lon moli ona la, jan li sona e sitelen ona taso. sitelen ona li suli, li wan taso lon sitelen ante tan ni: ona li kepeken nasin sin tawa kule lon lipu, li sona mute e lili mute pi sijelo jan, li sona mute e suno, e kasi, e ma, li wile sona e pilin tan tawa pi sinpin jan, e pilin tan tawa jan. ona li pana e sijelo jan tawa sitelen kepeken nasin sin, li tawa e sijelo tawa nasin musi. ona li ante e kule lon lipu kepeken ante lili taso. ni ale li kama lon pali suli ona ni: sitelen pi jan Mona Lisa en sitelen pi moku nanpa pini en sitelen pi meli lili pona lon kiwen

sitelen open

toki sewi suli (Annunciazione) li ken sitelen pini pi tenpo nanpa wan tan jan Lejonato

jan Lejonato en jan ona pi pana sona li pali e sitelen pi telo sewi li lon jan Jesu la, jan li kama sona e jan Lejonato. sitelen ante tu li tan tenpo sama. ona tu li sitelen pi toki sewi suli ni: sewi li toki e sin kama pi jan Jesu tawa jan Malija.

sitelen ni pi meli lili pona lon kiwen li lon tomo pi sona awen lon ma tomo Paki

sitelen lon tenpo pi poka pi sike nanpa 1480

jan li wile e pali tu pi suli mute, e pali ante wan. pali suli tu li kama ala pini. pali ante li kepeken nasin sin suli, li kepeken tenpo mute, li wile e toki mute tawa kama pini, tawa mani.

sitelen suli nanpa wan li sitelen pi jan sewi Jelome lon ma soweli. sitelen suli nanpa tu li sitelen pi pilin pona tan jan lawa sewi. jan Lejonato li tawa ma tomo Milan, li wile pali tawa jan Lutowiko Sosa la, sitelen ni li kama pini ala.

sitelen pi meli lon poka soweli

sitelen pi suli nanpa wan li sitelen pi meli lili pona lon kiwen. sitelen ni la, kulupu mama pi jan Jesu li kama lon poka pi jan lili ante. jan lili ni li jan Son pi telo pi pona sewi. sewi jan pi suli ala li awen e ona. sitelen ni tu li sama, li lon. tenpo ni la, sitelen wan li lon ma tomo Paki. sitelen ante li lon ma tomo Lonton.

tenpo sama ni la, jan Lejonato li open e sitelen pi pona nanpa wan tawa tenpo sama ni. sitelen ni li sitelen pi meli lon poka soweli. jan sona la, meli ni li jan Sesilija Kalelani (Cecilia Gallerani), li olin pi jan Lutowiko Sosa. tenpo sama ni la, sinpin jan li nasin wan lon sitelen. taso sitelen ni la, sinpin pi jan meli ni li tawa nasin ante. sona la, soweli walo li suli tawa jan meli anu suli tawa jan Lutowiko. jan Lutowiko li lon kulupu sewi pi soweli walo.

sitelen lon tenpo pi poka pi sike nanpa 1490

sitelen pi moku nanpa pini

sona pi jan mute la, sitelen pi mopu nanpa pini li sona nanpa wan. sitelen ni la, jan Jesu li pana e moku lon tenpo ona nanpa pini, li moku lon poka ona. tenpo pi toki sitelen la, jan Jesu li toki e ni: sina ale la, sina wan li kama ike e mi. toki ni la, jan pona pi jan Jesu li pilin nasa.

pali li pini la, sitelen li kama pali suli. taso ona li kama pakala lon tenpo. tenpo sike mute mute mute mute mute li pini la, jan wan li toki e ni: ona li pakala ale. tenpo mute la, sitelen pi sama ni li kama tan ni: kule li lon kiwen pi telo lili, li kama telo ala la, sitelen en kule li awen lon tenpo mute. taso jan Lejonato li kepeken kule walo lon sinpin, li sitelen lon kule walo la, sitelen li ken kama pakala, li ken weka lili lon tenpo.

sitelen lon tenpo kama pi tenpo sike nanpa 1500

sitelen pi jan Mona Lisa

jan Lejonato li sitelen e utala pi ma Ankijali (Anghiari) lon ma tomo Pilense lon sinpin wan la, jan Mikelanselo li sitelen e utala pi ma Kasina (Cascina) lon sinpin pi poka ante. sitelen pi jan Lejonato li kama pakala lon tenpo lili la, jan li sona e sitelen ona tan ni taso: jan Lupen (Rubens) li sitelen e sitelen pi jan Lejonato.

jan mute li sona e sitelen pi jan Mona Lisa tan tenpo sama ni. sitelen ni li suli tawa sona jan lon ma ale lon tenpo ni. toki Italija la, nimi ona li La Gioconda. kon pi nimi ni li ni: uta pi jan meli li kama lon sewi tan pilin pona.

nimi pi sitelen suli ante li meli pona en jan sin ona en jan sewi Ana. ona la, jan mama Malija li jo e jan lili ona Jesu, li supa monsi lon jan mama ona Ana. jan Jesu li jo e soweli len lili. soweli ni li sitelen tawa tenpo kama pi jan Jesu.

sitelen pi pimeja linja

ken la, jan Lejonato li sitelen e ona sama lon sitelen ni

jan Lejonato li sitelen linja mute, li pana e ona tawa lipu mute. sitelen kule mute la, sitelen linja mute li open ona. jan mute la, sitelen ni suli li sitelen pi jan mije Wituwijanotawa sona sijelo, li sitelen pi lawa pi sewi jan lili, li sitelen pi meli lili pona lon kiwen, li sitelen pi kasi Suno Pelejen (Star Of Bethlehem), li sitelen pi nimi meli pona en jan lili en jan sewi Ane en jan sewi Son pi telo sewi.

jan Lejonato li sitelen e tomo sewi, e nasin pi pali ona. jan li pali ala e tomo ni.

lipu

nasin sona en ilo sin

sona pi sijelo jan

sona pi nasin pali en ilo sin