jan sewi Le

tan lipu Wikipesija
Jump to navigation Jump to search
jan sewi Le li awen lon monsi

jan sewi Le (toki Masu pi sin ala: rꜥ; toki Nilemenkemi: ⲣⲏ, ; toki Elena: Ρα, Ra) li jan sewi pi nasin sewi Masu. ona li jan sewi suno. ona li lawa e suno e awen e jan lawa e sewi. nimi ona pi toki Masu li jo e kon suno. tenpo mute la lukin la ona li mije li jo e lawa pi waso alasa li jo e suno e akesi linja lon sewi lawa. jan li open olin sewi e ona lon ma tomo Anu. toki Elena la ma tomo Anu li jo e nimi Elijupoli. ni li jo e kon pi ma tomo suno. tenpo suno la ona li tawa kepeken tomo tawa telo lon sewi. tenpo pimeja ale la ona li tawa lon ma anpa moli. tenpo ni la akesi Apo li alasa moli e ona. taso jan sewi Sete en jan sewi Nipeho li awen e ona.

jan li sona ala e ni: mama ona li seme? jan mute lili li toki e ni: jan sewi Peta li pali e kiwen waso. jan sewi Le li kama tan kiwen waso ni. jan ante li toki e ni: ona li kama tan telo mama. jan ante li toki e ni: ona li kama lon kasi kule nanpa wan. ona li kama lon la ona li kipisi e palisa unpa ona. jan sewi So en jan sewi Hu li kama tan telo sijelo loje ona. ona mute li lon tomo tawa telo pi jan sewi Le. meli lili ona li jan sewi Haho li jan sewi Seme li jan sewi Upete.

jan mute li toki e ni: jan sewi mute li jan sewi Le. jan sewi Le en jan sewi Amon li jan sewi Amonle. jan sewi Le en jan sewi Olo li jan sewi pi jan lawa. jan li toki e ni: jan lawa moli la ona li tawa jan sewi Le. tan ni la ona mute li jan sewi Lejolasi. nimi Lejolasi jo e kon ni: jan sewi Le Olo lon ma open suno lon ma pini suno. jan ni li jan sewi pi tenpo suno. jan sewi Aton kin li lawa e suno. jan toki e ni: jan sewi Aton anu jan sewi Le li mama e ale. tan ni la ona mute li jan sewi Atonle. jan sewi Kopi kin li lawa e suno. tan ni la jan sewi Kopi en jan sewi Le li Lekopi. nasin ni la jan sewi Le en jan sewi mute li kama wan.

jan li toki e ni kin: jan sewi Le li jan sewi ante lon tenpo ante. jan sewi Kopi li jan sewi Le lon open pi tenpo suno. jan sewi Le li lon insa pi tenpo suno. pini pi tenpo suno la jan sewi Le li jan sewi Aton anu jan sewi Atonle. tenpo pimeja la jan sewi Le li lon ma anpa moli la ona li jo e nimi Apule li jo e lawa soweli pi palisa lawa tu. tenpo pimeja la ona li jo e nimi ni kin: soweli sewi lon ma pi pini suno.