jan sewi Olo

jan sewi Olo (toki Masu pi sin ala: ḥr; toki Nilemenkemi: ϩⲱⲣ, Hōr; toki Elena: Ὧρος, Hôros) li jan sewi pi nasin sewi Masu. tenpo pini la jan li olin sewi e ona lon ma Masu ale. ona li lawa e kon sewi e suno e jan lawa e awen pi ma Masu. lukin la ona li waso alasa. anu la ona li mije li jo e lawa pi waso alasa. ona li jan sewi pi kon sewi la nimi ona pi toki Masu li jo e kon pi jan weka. ona li jo e nimi Olasi kin. nimi ni li jo e kon ni: jan sewi Olo lon ma open suno lon ma pini suno. ona li jo e nimi ante mute. sitelen ona li sitelen Wesa. sitelen Wesa li jo e nimi ni kin: lukin pi jan sewi Olo. sitelen Wesa li sitelen awen. jan li pilin e ni: jan lawa li kama tan jan sewi Olo. kin la jan lawa li moli la ona li kama jan sewi Olo. jan lawa li moli la jan li toki e ni: “waso alasa li tawa sewi” tan ni.

sitelen pi jan sewi Olo lon tomo sewi pi jan sawa Sesi nanpa wan

jan sewi Olo tu li lon: jan sewi Olo pi sin ala en jan sewi Olo sin. jan sewi Olo pi sin ala anu jan sewi Awe li kama tan jan sewi Ke tan jan sewi Nu. lukin mute ona li suno li mun. jan sewi Olo sin anu jan sewi Apakele li kama tan jan sewi Wesile li kama tan jan sewi Ese. jan sewi Sete li moli e jan sewi Wesile la jan sewi Ese li len e jan sewi Olo. jan sewi Sete li pana e ijo ike mute tawa jan sewi Olo tan ni: jan sewi Sete li wile moli e jan sewi Olo. jan sewi Olo li kama suli la ona en jan sewi Sete li utala lon tenpo sike suno mute mute mute mute. pini la ijo tu li ken kama. nasin wan la jan sewi Olo en jan sewi Sete li kipisi e ma. jan wan li jo e kipisi. jan ante li jo e kipisi ante. nasin ante la jan sewi Olo li anpa e jan sewi Sete. nasin ale la awen li kama sin.

jan li kama pilin e ni: jan sewi Le en jan sewi Olo li sama li jan sewi Lejolasi. jan Alekanto suli li anpa e ma Masu la jan lawa Tolemi mute li kama lawa e ma Masu la jan Elena li kama pilin e ni: jan sewi Oli en jan sewi Apolon li sama. ona li pilin e ni kin: jan sewi Olo sin anu jan sewi Apakele li jan sewi Apokate. jan sewi Apokate li jan sewi Olo li lawa e sona len e kalama ala. lukin la ona li jan lili li luka e uta. jan sin pi ma Masu li jo e linja lawa lon poka pi lawa ona. jan sewi Apokate li jo e ni. tenpo mute la ona li jo e luka waso tu.

tan sonao ante

  • Asante, Molefi Kete, and Ama Mazama. “Heru, Horus.” Encyclopedia of African Religion, SAGE, London, 2009, pp. 313–315.
  • Bunson, Margaret. “Horus.” Encyclopedia of Ancient Egypt, Facts On File, New York, 2012, pp. 172–173.
  • Remler, Pat. “Horus.” Egyptian Mythology, A to Z, Chelsea House, New York, 2010, pp. 83–87.