kama kulupu Etoso

kama sona pi toki pona lon ma Elopa li kama kulupu pi toki pona. jan li tawa ona tan ni: jan li wile kama sona e toki pona lon poka jan ante. kama kulupu ni li lon ma tomo Pono lon ma Seki li lon tenpo mun nanpa luka tu tu lon tenpo sike 2015.

pilin en tan

tenpo sike mute la jan mute li tawa ma Lowenki tan ni: jan li wile kama sona e toki Epelanto lon poka jan ante. nimi pi kama kulupu ni lon toki Epelanto li Somera Esperanto-Studado. nimi lili ona li SES. jan Male li pana e nimi ona tawa toki pona. nimi pi kama kulupu ni li kama sona pi toki Epelanto lon tenpo seli. kulupu E@I li pali e kama kulupu ni.

tenpo sike 2015 la jan Elin li pali lon kulupu E@I. jan Elin en jan Wena li kama tawa kama sona pi toki Epelanto lon tenpo seli lon tenpo sike 2015. jan Elin li pilin e ni: mi o pali e kama kulupu sama tawa toki pona.

jan Wena li pana e nimi tawa kama kulupu ni. toki Epelanto la nimi ona li Eŭropa Tokipona Studado. nimi lili ona lon toki Epelanto li EToSo. nimi ona lon toki pona li kama sona pi toki pona lon ma Elopa. nimi lili ona lon toki pona li kama kulupu Etoso.

jan li lon kama kulupu Etoso

• jan Elin tan ma Losi (tenpo ni la ona li pali lon ma Lowenki)
• jan Wena tan ma Seki
• jan Male (tenpo lili) tan ma Seki
• jan Mimoku tan ma Netelan
• jan Tomi tan ma Tosi
• jan Piki tan ma Tosi
• jan Jana tan ma Losi (tenpo ni la ona li lon ma Tosi)
• jan Mika (tenpo lili) tan ma Lowenki

jan li pali e ni

sitelen:jan Male li toki sona kepeken toki pona

jan Male li toki e tenpo pini pi ma Seki.

jan ale li toki e toki pona lon tenpo mute. toki nanpa tu li toki Epelanto tan ni: jan ale li jan Epelanto.

tenpo suno nanpa wan la jan pi kama kulupu Etoso en jan Sonja li toki kepeken ilo Intene.

tenpo suno nanpa tu la jan Male li toki e tenpo pini pi ma Seki lon toki pona.

jan mute li lukin e ma tomo Pono. jan li pali e lukin pi ma tomo lon toki pona taso lon tenpo nanpa wan.

tenpo pimeja la jan Elin en jan Wena en jan Jana en jan Mimoku li lukin e ni: mun li kama pimeja lon tenpo lili.