kama sona pi jan Sonja

tan lipu Wikipesija
Revision as of 2021-06-16T10:17:21 by Kita (toki | ante) (→‎pali: aa mi toki e "lukin sama" mi pakala)
Jump to navigation Jump to search

kama sona pi jan Sonja li pali pi jan Sonja. ona li wile jo e sona ni: jan li ante toki e nimi pi toki Inli tawa nimi seme pi toki pona? ona li kama jo e sona tan jan pi ma pona pi toki pona.

kama sona nanpa wan li kama lon tenpo sike #2020 lon mun #11 lon suno #27.[1] nimi luka luka tu taso li lon ona. ona li pini lon tenpo suno sama. tenpo suno kama nanpa luka tu tu la, jan Sonja li pana e sona tan ona.[2] tenpo mun #12 la tenpo suno #8 la, lipu sin li lon. linja tawa ona li lon tomo #toki-pona, taso tenpo kama lili la ona li lon tomo #lipu, sama lipu pi kama sona pi tenpo kama.

pali

tenpo suno ale la, jan Sonja li pana e lipu pi wile sona. ona li jo e nimi mute pi toki Inli, li wile e ni: "sina toki e nimi ni kepeken toki pona kepeken nasin seme?". ona li tan nimi 5000 ni: toki Inli li kepeken ona lon tenpo mute li kepeken nimi ante lon tenpo lili.[3] taso nimi ante kin li lon. ni li ken tan wile pi jan Sonja, taso jan ante kin li ken wile e ni: jan Sonja li pana e nimi pi wile ona lon lipu.

tenpo suno li pini la, jan Sonja li pini e lipu pi wile sona, li pali e lipu ni: nimi pi toki Inli la, jan pi mute seme li pana e nimi seme pi toki pona? linja wan li sama ni:

copy: [sama 31, pali sama 13, jasima[nimi] 13, lipu sama 6][4]

nanpa li lon poka pi nimi pi toki pona, li toki e ni: jan pi mute seme li pana e nimi pu ni tawa nimi ni? taso, mute jan li ante lon kama sona ante. ni la, jan Sonja li mute e nanpa sama ni: mute jan li kama 100. ni la, jan 10 la jan 4 li kepeken nasin wan la, nanpa li sama ni: jan 20 la jan 8 li kepeken nasin wan. jan li wan e nanpa ale pi linja wan la, ona li ken lili tawa 100 tan ni: jan Sonja li weka e nasin pakala.

jan Sonja li wile e sona tan jan mute (lon poka pi mute 15). mute li lili lon tenpo suno kama pi pana lipu la, ona li pana ala e lipu sin, li toki e ni: "mi awen wile e sona tan jan [nanpa] pi toki pona pona".

sona

tenpo ni la, kama sona li awen. ni la, jan li ken ala lukin e sona ale ona, taso jan Sonja li pana e kipisi tu wan lon lipu kon ona, li pana e linja tawa ona lon ma pona pi toki pona.

nimi pu

lipu ni la, nimi pu ale li lon. nasin ona li sama nasin pi lipu pi tenpo suno wan, taso ona li kama ante: nimi pi toki pona li lon open. nanpa li lili la, kon li lon ala lipu. nimi pu ante la, nanpa pi lili ken li ante. nimi "o" la, kon pi nanpa 6 li lon, taso nimi mute ante la, nanpa 25 li lili nanpa wan.

lipu li pana e sona pi kon sin. wan la: jan mute li kepeken nimi "esun" tawa toki ni: jan li pana e ijo tawa jan ante, li kama jo e ijo tan ona. taso lipu pu la, nimi "esun" li toki e ma taso pi pali ni.

nimi pi pu ala

lipu ni li sama lipu "nimi pu", taso nimi pi pu ala li lon ona. jan Sonja li kipisi e ona tawa poki tu: nimi pi kepeken pi jan mute, en nimi pi kepeken pi jan mute ala. nanpa li lili la, kon li awen lon, taso ona li lon anpa.

tenpo la, jan Sonja li pana e kon pi nimi pi pu ala lon lipu, tan ni: nimi ala pi kon sama lon toki Inli li suli kepeken. jan li pana ala e nimi ni pi pu ala la, ona li sona ala e ona, anu ona li ike tawa ona.

kulupu nimi (toki Inli: compounds)

lipu ni la, nimi wan mute en nimi tu mute li lon. ni li tawa ala pali pi lipu ni: nimi ale pi toki Inli la, kulupu nimi wan pi toki pona li lon. sewi la, jan Sonja li toki e ni (kepeken toki Inli):

kulupu nimi kiwen li lon ala toki pona. ni li tan nasin ona! toki pona li tawa ijo mute, tawa ni kin: sina wile kipisi e ma poka sina tawa nimi lon tenpo toki, li wile ala toki e kulupu nimi sama tawa ijo sama lon tenpo ale. o toki insa e ni: ijo li seme tawa sina? seme ona li suli tawa sina? :)

tan sona

(sina lon ala ma pona pi toki pona la, sina ken ala lukin e toki. jan ale li ken lukin e lipu.)