leko Lupiko

leko Lupiko pi kule sama ala

leko Lupiko li ilo musi leko tan jan Eno Lupiko (toki Inli: Ernő Rubik). jan Lupiko li kama tan ma Mosijo (toki Inli: Hungary) li pali e ilo musi ni lon tenpo sike nanpa 1974, taso jan li ken esun e ona lon tenpo sike nanpa 1980. tenpo open la, nimi pi leko Lupiko li ‘leko nasa’. jan 450,000,000 li esun e ilo musi ni! ilo musi ni li wile e ni: lawa sina li pali mute. ni la, leko Lupiko li jo e nasin 43,252,003,274 489,856,000! nasin pali li ni: sina ken ante e sijelo ona. sina wile e ni: sinpin ale ona li jo e kule wan. ken la, pilin sina li ni: ona li wile ala e lawa suli. taso jan Lupiko li wile pini e musi ni la ona li wile e tenpo mun wan. tenpo ni la, jan li ken kepeken musi ni kepeken tenpo lili a. jan Juson Tu (toki Inli: Yusheng Du, toki Sonko: 杜宇生) li kepeken ona kepeken tenpo lili 3.47! toki pini la, leko Lupiko li wile e ni: lawa sina li pali mute. taso jan ale li ken kama sona nasin e ona. lipu Jutu li jo e sitelen tawa mute pi kama sona pona. tenpo ni la, leko Lupiko li ken leko ante. leko Lupiko li ken jo e sinpin mute e kule mute. jan li ken utala lon tenpo utala pi leko Lupiko lon ma ale.