ma Inli

ma Inli England
len ma	sitelen lawa
ma tomo lawa	ma tomo Lantan
ma suli	ma Juke
toki lawa	toki Inli
toki ante	toki Kenu
mani	mani pi ma Juke
ISO 3166	GB-ENG

lipu ni li wile e pali. sina ken pona e ona.

ma Inli li ma li lon ma Piten suli lon ma Juke. tenpo pini la, ma Inli li wawa. jan mute Inli li tawa ma ante mute li utala li lawa e jan mute. jan pi ma ante mute li toki e toki Inli. toki Inli li suli mute. ma tomo Lantan li ma tomo lawa pi ma Inli, li ma tomo lawa pi ma Juke.

ma Inli li lon poka pi ma Sukosi, li lon poka pi ma Kinli.

tenpo pini

tenpo lete suli la ma Tokelan li wan e ma Inli e ma Kanse. tenpo ni la jan li kama tawa ma Piten suli kepeken ma Tokelan. taso, telo suli li kama sewi e ma Tokelan la ma Tokelan li pini. jan tan ma Piten suli li pali e kiwen suli. kulupu kiwen Sonen li kiwen pali suli tan tenpo majuna. tenpo kama tawa tenpo ni, la jan pi kulupu toki Kelita li tawa lon ma Piten suli.

ma Loma suli li anpa e ma Inli e ma Kinli. ona li pali e tomo awen mute. ma Loma li open e ma tomo Lantan.

ma lawa lili pi ma Inli lon tenpo pi kulupu Ankosakon

ma Loma suli li pini la kulupu Anke en kulupu Jute en kulupu Sakon li tawa li anpa e ma Inli. ona li kama e kulupu Ankosakon li open e ma lawa lili mute. ma Wesi, en ma Mesija, en ma Etenka, en ma Ken, en ma Notanpija, en ma Ese, en ma Suse li ma lawa luka tu suli pi kulupu Ankosakon.

sike suno nanpa 886 la jan Alepe suli li kama jan lawa wan pi ma Inli.

sike suno nanpa 1066 la, jan utala mute tan ma Nomansi lon ma Kanse li kama li pakala e jan utala mute pi ma Inli li moli e jan lawa. jan lawa Wilijan pi jan Nomansi li kama jan lawa pi ma Inli.

sike suno nanpa 1215 la jan lawa Son li ken e lipu suli pi ma Inli. lipu ni li alasa kama jan pona e jan lawa pi ma Inli e jan lawa lili. taso, lipu ni li ike tawa jan lawa Son. utala pi jan lawa lili nanpa wan li open. jan Son li anpa e jan lawa lili.

sike suno nanpa 1337 la utala pi sike suno mute li open. ona la ma Inli li utala e ma Kanse tan wile pi lawa Kanse. sike suno nanpa 1453 la utala li pini. ma Inli li weka e ma ona lon ma Kanse.

sike suno nanpa 1603 la jan Seme nanpa luka wan pi ma Sukosi li kama jan lawa Seme nanpa wan pi ma Inli.

sike suno nanpa 1642 la utala kipisi pi ma Inli li open. utala ni la jan lawa Sa nanpa wan li moli. jan Olipe Konwe li kama jan lawa pi ma Inli li open e tenpo pi jan lawa sewi ala lon ma Inli. ona kin li kama kin jan lawa pi ma Alan, li kama jan lawa pi ma Sukosi. taso, sike suno nanpa 1658 la jan Olipe Konwe li moli. jan lawa Sa nanpa tu li kama jan lawa sewi pi ma Inli.

sike suno nanpa 1706 la kulupu lawa pi ma Inli li pali e lipu lawa. ona li kama wan e ma Inli, e ma Sukosi. sike suno nanpa 1707 la kulupu lawa pi ma Sukosi li kama e lipu lawa ni kin. ona tu li ken ma lawa pi Piten suli.

sike suno nanpa 1800 en sike suno nanpa 1801 la ma lawa Piten suli li wan e ma Piten suli e ma Alan. ona li kama e ma Juke.

tenpo kama tawa ni la ma Inli li ma lili pi ma Juke.

jan lawa

sina wile sona mute la lukin e jan lawa pi ma Inli.

mani sitelen pi jan Alepe suli

tenpo pini la jan lawa pi ma Inli mute li lon. jan Ape suli li jan lawa nanpa wan pi ma Inli. jan An li jan lawa nanpa pini tan kama pi ma lawa Piten suli. tenpo majuna la jan lawa pi ma Inli li jo e wawa lawa mute. taso, kulupu lawa pi ma Inli li lanpan e wawa lawa ona. jan lawa en kulupu lawa li jo e wawa lawa pi ma Inli.

tenpo kama pi sike suno nanpa 1707 la jan ala li ma lawa pi ma Inli.

ma

ma lili

sina wile sona mute la lukin e ma lili pi ma Inli.

ma lili mute lon ma Inli li lon. ona li kepeken e nasin tu wan pi kipisi ma. ona li nasin kipisi ma majuna, li nasin kipisi ma tan musi, li nasin kipisi ma tan lawa. mute la ma lili musi en ma lili lawa en ma lili majuna li jo e nimi sama e sijelo sama. taso, ona tu wan li sama ala.

ma tomo

ma tomo mute li lon ma Inli. ma tomo Lantan li ma tomo lawa, li ma tomo pi suli nanpa wan. ma tomo Lipepu, en ma tomo Mansete, en ma tomo Pito li ma tomo suli ante.