mama sewi

tan lipu Wikipesija
Jump to navigation Jump to search
sitelen pi mama sewi lon sitelen Alapi

mama sewi li jan sewi pi suli mute. tenpo mute la ona li jan sewi taso li mama e ale li lon ma ale li sona e ale li ken pali e ale li pona mute li kon li sijelo ala. tenpo mute la ona li toki tawa jan wawa. nasin wan la mama sewi li mije ala li meli ala. nasin ante la mama sewi li mije anu meli.

nasin sewi li jo e mama sewi wan anu mama sewi mute. nasin sewi ante li jo e mama sewi ala kin. jan ante lon nasin sewi ante li jo e sitelen ante pi mama sewi ona. mama sewi li jan ala tawa jan mute. tan ni la ona li jo ala e nimi pi jan sewi li jo e nimi sewi taso.

nasin sewi ante la mama sewi li jo e nimi mute. nasin sewi Jejuta la ona li sewi Ele (toki Isiwi. El) li sewi Jawe (toki Iwisi: YHWH). jan pi nasin sewi Jejute li ken ala toki e nimi Jawe. nasin sewi Silami la mama sewi li sewi Alaku (toki Alapi: Allāh). nasin sewi Salatuta la ona li sewi Ajura Mata (toki Aweta: Ahurā Mazdā; toki Ilan: Ohrmazd). nasin sewi Intu la ona li sewi Paman (toki Sankita: Brahman) li sewi Iwala (toki Sankita: Īśvara). nasin sewi Siki la ona li sewi Wajekulu (toki Punsapi: Vāhigurū).