mun Wenu

tan lipu Wikipesija
Revision as of 2021-05-07T18:10:04 by Tekinowi (toki | ante)
Jump to navigation Jump to search
sitelen pi mun Wenu.
sitelen selo pi mun Wenu. ilo Winela 9 li sitelen e ni.

suno mi la, mun Wenu (toki Lasina: Venus) li mun nanpa tu. suli pi mun Wenu li sama e suli pi ma sike Tela. mun Wenu li jo e kon mute. tan ni la ona li seli mute. kon li len e selo, li awen e seli. mun ante la selo ona li seli mute. ona li jo e kon mute la sina ken ala lukin e selo. kon ona li jaki. selo ona li supa mute. taso, nena pi pana telo suno li lon selo ale. jan sona li pilin e ni: tenpo pini mute la mun Wenu li sama e ma sike Tela. tu li jo e kon, li suli sama, li seli sama. tan ni la jan li toki e ni: mun Wenu li jan sama pi ma sike Tela. mun Wenu li jo ala e mun lili. nimi pi mun Wenu li sama e jan sewi tan nasin sewi Loma. jan sewi ni li lawa e olin, e unpa, e mama.

ilo pi mun Wenu

ma Sesesele li pana e ilo mute tawa mun Wenu. ilo ni li kulupu pi ilo Winela (toki Losi: Вене́ра), li kama sona e ijo mute pi mun Wenu. ilo Winela 3 li kama lon selo pi mun Wenu. taso, ona li pakala tan ni: ona li jo ala e wawa li ken ala toki tawa ma Sesesele. ilo Winela 4 li kama insa kon la kon li pakala e ona. taso, ona li ken pilin e kon kepeken ilo ona. ilo Winela 7 li kama lon selo kepeken tenpo lili. ona li kama sona e seli selo e ni: telo li lon ala. ilo Winela 9 li kama lon selo li sitelen e selo.

ma Mewika li pana kin e ilo. ilo ni li tan kulupu pi ilo Mawine (toki Inli: Mariner). ilo Mawine 2 li pilin e wawa kon kiwen e kon e suli pi mun Wenu. ilo Mawine 5 li pilin e wawa kon pi lukin ala. ona li pilin kin e kon e wawa kon kiwen.