toki pona

tan lipu Wikipesija
Revision as of 2023-01-26T06:28:47 by Tepo (toki | ante) (ilo li ante e nimi pi nasin lipu tan "ijo:" tawa "sitelen:")
Jump to navigation Jump to search
toki pona
Toki pona.svg
kalama /ˈto.ki ˈpo.na/ (sona)
mama jan Sonja
kulupu toki toki sin
nasin sitelen
toki luka toki pona luka

luka pona

nanpa toki
ISO 639-3 tok
IETF tok

toki pona li toki sin nasin musi tan jan Sonja. ona li pali e toki tawa ni: jan li ken pona e pilin ona e toki ona. ona li pana pi tenpo nanpa wan e ona lon lipu ilo. open la ona li pini ala. jan Sonja li pana e selo pini toki lon lipu nanpa wan pi toki pona lon tenpo suno 2014. jan li kepeken lipu ona la ona li pu. tenpo sike 2021 la, jan Sonja li pana e lipu sin pi toki pona. ni li lipu ku. ona li poki nimi pi toki pona. open la kulupu li lili. taso ona li kama suli. tenpo mute la kulupu li lon ilo. taso tenpo lili la jan li kama kulupu lon ma lon tenpo pini. nimi pi toki pona li tan toki mute: toki Topisin en toki Sumi en toki Lowasi en toki Epelanto en mute pi toki ante.

nimi

nimi "toki" li tan nimi tok pi toki Topisin tan nimi talk pi toki Inli. nimi "pona" li tan nimi bona pi toki Epelanto tan nimi bonus pi toki Lasina.

tenpo pini

jan Sonja li pana e selo open pi toki pona lon tenpo sike 2001. ona li pana e sona pi toki pona lon lipu tokipona.org. open la jan mute li kulupu lon kulupu pi toki pona pi lipu Jaju. tenpo mute la, jan mute li kama sona e toki pona. tan ni, kulupu pi toki pona li kama suli. tenpo la, jan Sonja li pana ante lili sin tawa toki pona.

tenpo sike 2014 la ona li pali e lipu pu lon toki Inli. ona li pana e lipu ni lon toki Kanse lon tenpo sike 2016. lipu pi toki pona napa tu (lipu ku) li kama lon tenpo sike 2021.

tenpo sike 2008 la kulupu ISO-639 li pini e lipu tan jan pi toki pona tan ni: tenpo pini la toki ni li jo e sike suno lili. tenpo sike 2018 la kulupu ni li pini e lipu ante tan ni: jan pi toki pona li kulupu lili. tenpo sike 2022, jan pi toki pona li pana e lipu sin tawa kulupu ISO. tenpo ni la, ni li pona tawa kulupu ISO. ona li pana e nanpa toki tawa toki pona: "tok".

sitelen en kalama

sitelen Lasina pi toki pona

kulupu kalama pi toki pona li lili. ni la jan mute li ken kalama e ona kepeken pali mute ala. kalama open li kalama wawa.

poki anpa la kalama li lon nasin sitelen kalama pi ma ale.

sinpin insa monsi
kon nena m n
kon pini p t k
kon pini lili s
open w l j
sinpin monsi
pini i u
insa e o
open a

lipu pi toki pona

lipu tan jan Sonja

pu la jan li kepeken lipu nanpa wan pi toki pona tan jan Sonja. ona li toki e nasin toki pi jan Sonja.

lipu ku li lipu sin li lipu nimi pi toki pona tan jan Sonja. lipu ni la, ona li alasa sona tan kulupu pi toki pona.

lipu tan jan ante

kulupu

kulupu mute pi toki pona li lon.

kulupu pi toki pona lon lipu Wesi li suli nanpa wan. sama la ma pona pi toki pona pi ilo Siko li kulupu suli pi toki pona.

kulupu pi ilo Telekan en kulupu pi lipu Pesepu li lon kin. jan mute li toki e toki pona kepeken ilo Tuwita li kepeken lipu toki.social pi ilo Masoton.

kulupu ma mute li lon. KTPA (kulupu pi toki pona pi ma Anku) li lon kin. sama la kulupu pi toki pona li lon lipu VK pi ma Losi.