toki sin

len sitelen pi toki sin li jo e tomo suli pi ma tomo Papili

toki sin li toki tan pali jan anu pali pi kulupu jan. sama ala toki ante la ona li kama tan pali wile.

jan li pali e toki sin tan ijo ante mute. toki sin pi ma ale la jan li wile wan e kulupu jan. toki sin lipu la jan li pali e toki sin tawa lipu musi. toki sin musi la jan li pali e toki tan musi ona. toki nasin la jan li wile kama e nasin lon toki sin.

kulupu pi toki sin

toki pi jan mute

toki pi jan mute la, jan li toki insa e ni: jan mute li toki kepeken toki mute, li sona ala e toki pi ona ante, li utala. toki wan li lon la, jan li ken toki tawa ona ante, li ken pona.

toki pi jan mute nanpa wan li toki Olapi (Volapük). jan Jokan Masin Saja (Johann Martin Schleyer) li pali e ona. nimi "Volapük" li kama tan nimi "vol" (ma ale) en nimi "pük" (o toki), li toki e ni: "toki pi ma ale". tenpo pini la, jan mute li toki e ona. taso, ona li ike tawa jan mute. kulupu toki ona li lili.

nimi pi toki Olapi li kama tan toki Inli, tan toki Tosi, tan toki Kanse. nasin toki ona li pali e ni: jan li sin e wan lili tawa nimi la, kon nimi li ante. nasin ni li ken pali e mute. taso, jan li wile kama sona e toki sin la, ola li ken ike tawa jan.

toki pi jan mute suli nanpa wan li toki Epelanto (Esperanto). jan Luwi Sameno (Ludwik Zamenhof) li pali e ona.

nimi ona li kama tan toki mute pi ma Elopa. nasin ni li lon: jan li ken pali e nimi sin kepeken wan pi nimi ante. jan li sama e ona tawa toki ante pi ma Elopa la, nasin toki Epelanto li lili, li pona.

nimi mute pi toki pona li kama tan toki Epelanto. nimi "ilo" en nimi "suno" li kama tan ona.

tenpo ni la, toki Epelanto li toki sin suli nanpa wan.

toki pi sitelen musi

toki pi sitelen musi li kama tan ni: sitelen musi la, ma ante li lon. jan pi ma ni li ken ala toki kepeken toki lon. toki ante li wile.

jan Son Tokijen (John R.R. Tolkien) li pali e toki sin mute tawa sitelen musi ona. toki Kuwenja (Quenya) en toki Sintalin (Sindarin) li toki sin ona. taso, toki ante ona li lon.

tenpo mute la, kulupu li pali e sitelen musi la, ona li pana e pali ni tawa jan pi sona toki: o pali e toki sin tawa kulupu jan pi sitelen musi. jan Ma Okan (Marc Okrand) li pali e toki Sinan (tlhIngan Hol) tawa jan Sinan pi sitelen tawa "nasin pi mun seli" (toki Inli: Star Trek). jan Tewi Piteson (David J. Peterson) li pali e toki Tosulaki (Dothraki) tawa sitelen musi "Game of Thrones".

toki pi nasin toki insa

jan mute li toki insa e ni: toki ona li ante e toki insa ona.

jan So Owe (George Orwell) li toki insa e ni: sina weka e nimi tan toki la, jan li ken ala toki insa e ijo ona. lipu 1984 ona la, ona li toki e toki Tokisin (toki Inli: Newspeak). toki ni la, nimi mute li ante, li weka tan ni: jan li ken ala toki insa e ijo ni: ona li ike tawa kulupu lawa.

kulupu "LLG" (toki Inli: Logical Language Group, "kulupu toki pi nasin nanpa pi toki insa") li pali e toki Losupan (la .lojban.). nasin ona en nasin pi toki ante li ante mute. wile ona li ni: jan li toki kepeken toki Losupan la, kon wan taso pi toki ona li ken. jan ante li ken ala kama sona ike e toki ona.

jan Sonja (Sonja Lang) li pali e toki pona tawa nasin pi ante ale: ona li wile lili pona e nasin pi toki insa. nasin pi toki pona li lili mute, li pona mute. tan ni la, jan li ken kama sona e toki pona kepeken tenpo lili. toki sin li toki. jan li pali e ona.

toki sin ante

toki sin li mute:

• toki pona - tan jan Sonja
• toki Epelanto - tan jan Sameno
• toki Elepen - jan Joji Puwe
• toki Elunsi - tan jan Koleko
• toki Kuwenja - tan jan Toliken
• toki Lokoso - tan jan Ota
• toki Losupan
• toki Ikuli - tan jan Sonkiwata
• toki Intelinwa
• toki Intelinwe
• toki Ito
• toki Pasiki - tan jan Sen
• toki Sinan - tan jan Makokan
• toki Soleso - tan jan Sute
• toki Soma - tan jan Ewen
• toki Sowijo
• toki Tusaki - tan jan Tawi Peteson

ar - de - en - eo - fr - he - hu - ia - ja - nl - pl - ro - sv - sw