utala pi ante suli pi ma Mewika

tan lipu Wikipesija
Revision as of 2020-08-18T22:14:00 by tokipona>NotHasnt (kulupu lili)
Jump to navigation Jump to search

utala li open lon ma tomo Lexington. jan Paul Revere li lukin e jan utala Piten kama. jan Revere li tawa jan mute li toki e ni: "jan Piten li kama! jan Piten li kama!" ma tomo Concord li poka ma tomo Lexington. jan pi ma tomo Concord li jo e ilo moli li moli e jan utala Piten mute.

ni li ike tawa jan lawa pi ma Piten. ona li pana e jan utala Piten sin mute.

jan utala Piten li pakala mute e jan utala Mewika. jan George Washington li lawa e kulupu utala Mewika. ona li sona mute li lawa pona e kulupu utala Mewika. taso kulupu utala Piten li wawa mute. jan Mewika li ken ala anpa e ona.

tenpo lete li kama. jan utala Mewika li jo ala e moku e len. kulupu utala Mewika li awen lon ma ante li utala e jan Piten. jan utala Mewika li pilin ike.

jan Thomas Paine li wile mute e ni: ma Mewika li anpa e jan Piten. toki pi jan Thomas Paine li kama e ni: jan utala Mewika li pilin pona.

tenpo pimeja la jan utala Mewika li tawa jan utala Tosi. (jan utala Tosi li utala tan ni: jan lawa pi ma Piten li pana e mani tawa ona.) jan Tosi ni li nasa. jan utala Mewika li anpa e ona.

ni li pona mute tawa jan Mewika. jan Mewika li pilin e ni: "ken la mi mute li ken anpa e jan Piten." jan Mewika mute sin li wile utala.

jan utala Kanse li tawa ma Mewika. jan Piten li ike tawa jan Kanse. jan Kanse li utala lon ma Mewika tan ni. jan utala Kanse li pana e sona utala mute tawa jan utala Mewika. kulupu utala Mewika li kama wawa.

jan Cornwallis li lawa e kulupu utala Piten lon ma tomo Yorktown. jan utala Mewika mute li kama tawa ma ni. jan utala Piten li ken ala anpa e jan Mewika ni. jan Cornwallis li wile e ni: jan utala Piten li tawa weka tan jan utala Mewika. ona li tawa telo li lukin e ni: tomo tawa telo utala Kanse li awen lon telo. jan Cornwallis li ken ala tawa.

jan Mewika li anpa e kulupu utala Piten. ni li pini e utala pi lawa Mewika.

de - en - eo - es - fr - it - ja - nl - sv