jan Kapipo

jan Kapipo Gabibbo
kama lon	ma Italija 1990
mama	jan Antonijo Lisi

jan Kapipo (toki Italija: Gabibbo) li jan pi kalama musi uta li jan powe pi sitelen musi li tan ma Italija. jan Antonjo Lisi li pali e ona. jan Kapipo li mije.

sitelen tawa

jan Kapipo li lon sitelen tawa ni:

• sitelen Sisa La Notisa (toki Italija: Striscia la notizia, "linja pi sona sin");
• sitelen Weline (toki Italija: Veline, "meli suwi");
• sitelen Welone (toki Italija: Velone, "meli musi");
• sitelen Kutula Motena (toki Italija: Cultura moderna, "sona pi tenpo sin");
• sitelen Papelisima Pin (toki Italija: Paperissima Sprint, "musi wawa pi sama waso").

kalama musi

jan Kapipo li pali e kalama musi mute.

kalama kulupu la:

• tenpo sike nanpa 1991 la, kulupu My Name Is Gabibbo (toki Inli, "nimi mi li Kapipo") li jo e kalama luka tu wan;
• tenpo sike 1995 la, kulupu Un Attimino (toki Italija, "o awen lon tenpo lili") li jo e kalama luka luka;
• tenpo sike 1996 la, kulupu Fu Fu Dance (toki Inli, "tawa musi Pupu") li jo e kalama luka luka.

kalama pi kulupu ala la:

• tenpo sike nanpa 1990 la, kalama Ti Spacco La Faccia (toki Italija, "mi wile pakala e sinpin sina");
• tenpo sike nanpa 1991 la, Ma Sei Scemo!? (toki Italija, "ken sona la lawa sina li jo e wawa lili anu seme").

kulupu pi kalama musi la:

• tenpo sike nanpa 2008 la, kulupu Veline Striscia La Compliation (toki Italija en toki Inli, "meli suwi la linja kulupu").

sitelen tawa suli

• sitelen Kusolo (toki Italija: Cucciolo, "jan lili suwi"). jan Neli Palenti li pali e sitelen tawa ni lon tenpo sike nanpa 1998;
• sitelen Kapitan Pasiliko #2 (toki Italija: Capitan Basilico 2, "nanpa tu la jan lawa pi lipu kasi namako"). jan Masimo Molini li pali e sitelen tawa ni lon tenpo sike nanpa 2011.

tan nimi

nimi Kapipu (toki Likulija: Gabibbo [ɡaˈbibu], "jan pi tan ma ante") li tan nimi Kapi (toki Alapi: حَبيبْ habib, "jan pona").

open la, jan li tan ma Likulija tawa ma Eliteja. poka telo la, jan li tawa e poki. jan tawa mute li jo e nimi jan Kapi.

tenpo ante la, nimi Kapipu li kama pana e sona ni: jan li lon ma Likulija li tan ma ante. tenpo ante la, jan mute li tawa ma Likulija tan kipisi ma Italija pi lon poka pi linja sike pi lon sike ma; ni la, nimi Kapipu li kama nimi pi kulupu jan ni. nimi ni la, kulupu ni li ike ala tawa jan toki, ona li musi tawa jan toki.

nasin

ijo Kapipo li sijelo len. lukin la, ona li sama jan ni: linja ala li lon lawa ona, sijelo ale ona li loje, oko ona li walo, nena sinpin ona li lili li sike, uta ona li suli, insa pi uta ona li pimeja. ona li ken jo e len namako. tenpo mute la, ona li jo e len lili ni: len namako li sama pipi lipu li lon noka lawa ona, kiwen namako li lon luka ona, len walo lili li sama len namako pi lupa pini li nasa lukin. tenpo open la, ona li jo e len ala.

jan Kapipo li tan ma Likulija. jan li sona e ni tan mute. toki pi jan Kapipo la kalama li sama kalama pi jan pi ma Likulija. ona li kepeken nimi mute ni pi toki Likulija: "balette, belandi, besugo, figgeu, mea, nescio, rumenta, palanche".

open la, jan Kapipo li wile pana e pilin ike tawa jan. tenpo sin la, ona li wile pona e jan li wile weka e nasin ike.

tomo sona suli Weten Kentaki la utala lawa

len loje suli Piwe

tenpo sike nanpa 1979 la jan li pali e len loje suli Piwe. len Piwe li len pi tomo sona suli Weten Kentaki. ona li pona e pilin pi jan pi pali sijelo musi ni: jan li tawa e sike palisa kepeken noka. len Kapipo li kama lon tenpo sike nanpa 1990. ona tu li sama lukin. jan Sanpanko Tanki li kama sona e ni lon tenpo sike nanpa 2003. ona li wile toki e pali ike pi jan Antonjo Lisi. tenpo kama la, kulupu Weten Kentaki kin li wile toki e ni. ona li wile e ni: jan Lisi li pana e mani.

tenpo sike nanpa 2017 la, jan lawa pi ma Italija li toki e ni: len Piwe li pali musi ala, jan li pali e ona kepeken ken ala, kepeken sona ala, kepeken musi ala. ni la, jan lawa li toki e ni: kulupu Weten Kentaki o pana e mani pi mute ni tawa jan Lisi: jan Lisi li pana e mani ni tawa jan pi sona lawa.