jan So Paten
| jan So Paten
Joseph Robinette Biden Jr. | |
|---|---|
| |
| pali | jan lawa |
| kama lon | ma Pensiwenja lon ma Mewika
sike nanpa 1942 |
| jan olin | jan Nelija Anta • jan Si Seko |
| jan lili | jan Po • jan Anta • jan Najomi • jan Asuli |
jan So Paten (toki Inli: Joe Biden) li jan lawa nanpa 46 pi ma Mewika. ona li jan pi kulupu Temokasi. ona li open lawa lon sike nanpa 2021 li pini lon sike nanpa 2025. tenpo pini la ona li jan lawa nanpa tu pi jan Pawa Opama. ni li open lon sike nanpa 2009 li pini lon sike nanpa 2017.
ona li open lon ma tomo Kenton pi ma Pensiwenja. ona li lili la ona li lon ma ma Telawe. ona li pini e kama sona lon tomo sona suli pi ma Telawe lon sike nanpa 1965. ona li pini e kama sona pi nasin lawa lon tomo sona pi ma Siwaku lon ma lili Nujo lon sike nanpa 1968.
sike nanpa 1972 la ona li anpa e jan Kele Pa li kama jan pi pali lawa lon ma Telawe. ni li open lon sike nanpa 1973 li awen tawa sike nanpa 2009. ona li alasa kama jan lawa pi ma Mewika lon sike nanpa 1988 lon sike nanpa 2008. taso ona li kama ala ni. tenpo pi alasa ni pini la jan Pawa Opama li wile e ni: jan Paten li kama lawa lon poka ona. jan Paten li lawa lon poka pi jan Opama lon sike lawa tu.
sike nanpa 2020 la jan Paten li kama alasa sin e ni: ona li kama jan lawa pi ma Mewika. ona li alasa e ni lon poka pi jan Kamala Ewi. ona li anpa e jan lawa Tana Tan li kama jan lawa sin.
sike mun nanpa tu tu pi tenpo sike 2023 la jan Paten li open sin e alasa ni: ona li kama jan lawa sin pi ma Mewika lon tenpo sike 2024. jan mute pi kulupu Temokasi li wile e ona. taso tenpo mute pi tenpo sike 2024 la jan li kama toki mute wawa e ike ona. wile ona la jan Paten o weka tan wile lawa sin. jan Paten li kute e jan mute ni li toki e ni: ona li kama ala alasa sin e wawa lawa. toki ona sin la jan ale o wile e jan Kamala Ewi. jan Ewi o kama jan lawa sin.wile pi jan lawa li pini la, jan Tana Tan li anpa e jan Kamala Ewi li kama jan lawa sin pi ma Mewika lon tenpo sike nanpa 2025.
kulupu mama[o ante | o ante e toki ilo]
tenpo pini la ona li olin e jan Nelija Anta Paten. ona tu li kama wan lon olin li mama e jan Po e jan Anta e jan Najomi. pakala pi tomo tawa la jan Nelija en jan Najomi li moli. tenpo ni la meli olin pi jan Paten li jan Si Paten. ona tu li mama e jan Ali.