jan sewi Seju
jan sewi Seju (toki Elena: Ζεύς, Zeús) li jan sewi pi nasin sewi Elena. ona li lawa e kon sewi e seli sewi. nimi ona pi toki Elena li kama tan nimi *Dyēus. ni li jo e kon pi kon sewi. nasin sewi Loma la ona li jan sewi Jupite.
mama mije ona li jan sewi Kono. mama meli ona li jan sewi Leja. jan sewi Leja li kama e jan sewi Hesija e jan sewi Temete e jan sewi Hela e jan sewi Hate e jan sewi Poseton e jan sewi Seju. jan lili li kama lon la jan sewi Kono li alasa moku e ona. tan ni la jan sewi Leja li pilin ike. ona li pana ala e jan sewi Seju tawa jan sewi Kono. ona li pana e kiwen tawa jan sewi Kono. ona li pana e jan sewi Seju tawa jan sewi tawa mama ona. mama ona li jan sewi Kaja li lawa e jan sewi Seju li suli e jan sewi Seju.
jan sewi Seju li kama suli la ona li tawa jan sewi Kono. ona li weka e jan sama mute ona tan insa pi jan sewi Kono. ona li weka e jan mute pi lukin wan e jan mute pi luka mute tan ma anpa ike. tenpo suli la jan sewi Seju en jan sama mute ona en jan mute pi lukin wan en jan mute pi luka mute li utala e jan sewi Kono e jan sama mute pi jan sewi Kono. jan sewi Seju li anpa e jan sewi Kono e jan sama ona li tawa e ona mute tawa ma anpa ike.
jan sewi Seju li kama jan lawa pi jan sewi lon nena Olinpo. jan sewi Poseton li kama jan lawa pi telo suli. jan sewi Hate li kama jan lawa pi ma anpa moli. jan sewi Seju li jo e meli luka tu e jan olin mute li mama e jan lili mute. tan ni la jan sewi Hela li pilin ike li utala e jan olin pi jan sewi Seju e jan lili pi jan olin.
jan sewi Pometeju li mama e jan ale tan ko li pana e seli tawa ona mute. jan sewi Atena li pana e ken pilin tawa ona mute. tan ni la jan sewi Seju li pilin ike mute. ona li pilin e ni: mama ona li moli e mama mama ona. kin la ona li anpa e mama ona. ken la jan ale li anpa e ona. tan ni la ona li weka e seli tan jan ale. jan sewi Pometeju li pana sin e seli tawa jan ale. tan ni la jan sewi Seju li pana e ike tawa ona mute. ona pana e jan sewi Pometeju lon kiwen. tenpo suno ale la waso kama li moku e insa pi jan sewi Pometeju. tenpo suno ale la insa ona li kama sin. jan sewi Seju li pana e jan Pantola tawa jan ale. ona li meli li jo e poki. jan sewi Seju li toki e ni tawa jan Pantola: o open ala e poki. taso ona li open e poki. ike en pilin ike en sijelo jaki li kama tan poki. wile pi tenpo kama li awen lon poki.