musi Pakuman

ilo pi musi Pakuman lon tomo sona pi ilo musi pi ma tomo Sokon.

musi Pakuman (toki Inli: Pac-Man, toki Nijon: パックマン) li musi ilo. kulupu Namuko (toki Inli: Namco) li pali e ona lon sike 1980.

ni li sike moku Pakuman. ona li jo e uta suli.

musi ni la, sike moku Pakuman li jelo, li lon tomo pi nasin mute, li moku e moku mute. monsuta tu tu li alasa e ona. nimi pi monsuta ni li ni:

• monsuta loje li monsuta Linki (toki Inli: Blinky). monsuta Linki li wile tawa sike Pakuman taso. moku lili li awen lon la, tawa ona li kama wawa mute.
• monsuta pi loje walo li monsuta Pinki (toki Inli: Pinky). monsuta Pinki li wile tawa sinpin pi sike Pakuman.
• monsuta laso li monsuta Inki (toki Inli: Inky). monsuta Linki li tawa sike Pakuman la, monsuta Inki li wile tawa sike Pakuman tan poka ante.
• monsuta pi loje jelo li monsuta Ka (toki Inli: Clyde). sike Pakuman li weka la, monsuta Ka li wile tawa sike Pakuman. ante la, monsuta Ka li wile tawa poka open pi anpa tomo.

nasin musi

sike Pakuman li wile moku e moku ale lon tomo. ona li moku e moku ale la, ona li tawa tomo kama.

monsuta li kama lon sike Pakuman li moku e ona la, sike Pakuman li moli. sike Pakuman li jo e lon tu wan. moli la sike Pakuman li kama lon sin kepeken lon wan. sike Pakuman li kama jo e nanpa 10,000 la, ona li kama jo e lon wan sin. lon ale ona li weka la, musi li pini.

moku wawa tu tu li lon. sike Pakuman li moku e ni la, monsuta ale li kama laso telo. monsuta li laso telo la, sike Pakuman li ken moku e ona. sike Pakuman li moku e monsuta la, monsuta li kama oko taso, li kama sin tawa tomo open ona. tenpo lili li weka la monsuta li kama lon sin.

sike Pakuman li moku e moku ale lon tomo la, tomo sin li open. tomo ale li jo e kili. tenpo tu pi tomo ale la, kili ni li kama lon li awen lon tenpo lili. sike Pakuman li moku e kili ni la, ona li kama jo e nanpa namako.

tenpo pini

musi Pakuman li pali tan jan Tolu Iwatani (toki Nijon: 岩谷徹, toki Inli: Toru Iwatani) pi kulupu Namuko. tenpo pini la, musi ilo tawa mije li suli mute. jan Tolu li lukin e musi ilo ni, li pilin e ni: ona li wile pali e musi ilo tawa meli. ona li sona e ni: moku suwi li pona tawa meli. ni la, ona li pali e musi moku. nimi "Pakuman" li tan kalama pi uta open pini. kalama ni li sama kalama "paku-paku." tenpo ni la, nimi ona li "Puck-Man."

kulupu Namuko pi ma Mewika li ante e nimi tawa nimi Pakuman, tan ni: jan ike li ante e sitelen P lon nimi "Puck-Man".

sike 1982 la, kulupu Atawi (toki Inli: Atari) li tawa e musi Pakuman tawa ilo Atawi 2600. ilo ni li jo e wawa lili la, musi ni li ike. kin la, kulupu Ana-Papewa (toki Inli: Hanna-Barbera) li pali e sitelen tawa Pakuman.

nasa pi tomo nanpa 256

lon tomo nanpa 256 la, musi li kama nasa. poka pini tomo li kama weka li kama sitelen nasa. sina ken ala anpa e ni, tan ni: moku li weka lon poka pini tomo la sina ken ala moku e moku ale. ni la, sina ken kama jo e nanpa 3,333,360 taso.