nasin sewi Jejuta

tan lipu Wikipesija
Jump to navigation Jump to search
mun pi jan Tawi

nasin sewi Jejuta (toki Iwisi: יַהֲדוּת‎) li nasin sewi suli. ona li nasin sewi pi jan Jejuta. ona li nasin sewi pi mama Alawan.

lipu sewi suli ona li lipu Tanaka. lipu Tanaka la lipu Towa ("lipu pi pana sona" anu "lipu lawa") en lipu Newin ("lipu pi jan toki sewi") en lipu Ketupin ("lipu sitelen") li lon. lipu ante mute li lon kin. tenpo mute la jan sona Jejuta mute li toki e nasin sewi. toki ona li lon lipu Tamu ("lipu pi pana sona"). ni li lipu suli tawa nasin sewi Jejuta pi jan sona.

nasin sewi lili mute pi nasin sewi Jejuta li lon. ona mute li kama tan nasin sewi Jejuta pi jan sona tan tenpo pini. nasin ni la sewi li pana e lawa ona tawa jan Mose lon nena Sinawi. nasin ante sama nasin Jejuta pi jan Sato anu nasin Jejuta pi ma Elena la ni li ante lon tenpo pi tomo sewi nanpa tu. tenpo ni la nasin sewi Jejuta pi ante ala en nasin sewi Jejuta awen en nasin sewi Jejuta ante li nasin suli pi nasin sewi Jejuta.

tenpo pini pi weka mute la nasin sewi Jejuta li kama lon tan kulupu pi ma Isale. ni la ona li nasin sewi suli lon ma Isale. sama la jan Jejuta mute li lon ma Mewika. taso jan pi nasin sewi Jejuta li lon ma ale. tenpo pini la jan Jejuta mute li lon ma Apika. taso ona mute li tawa ma Isale. tenpo sama kin la jan Jejuta mute li lon ma Elopa. taso jan Jejuta mute li moli lon tenpo ike moli pi jan Jejuta tan kulupu ike Nasi.