nasin sewi Otun

tan lipu Wikipesija
Jump to navigation Jump to search
jan Mali Lapo. ona li jan pali sewi pi nasin sewi Otun.

nasin sewi Otun anu nasin sewi Otu anu nasin sewi Utu (toki Pon: Vodun; toki Kejo: Vodou; toki Inli: Voodoo, Hoodoo) li nasin sewi tan ma Apika pi pini suno. kulupu Ewe en kulupu Jolupa en kulupu Pon li pilin wawa e nasin sewi ni lon ma Awisi lon ma Kana lon ma Naselija lon ma Penen lon ma Toko. nimi ona li jo e kon pi jan sewi.

ona li jo e nimi mute. ma Penen la ona li jo e nimi Nuputo e nimi Nukonkon e nimi Nusiju e nimi Jewe e nimi Un. nimi Nuputo (toki Pon: Nubudo) li kon. jan li ken ala toki pona e ona. nimi Nukonkon (toki Pon: Nugongon) li kon suli. nimi Nusiju (toki Pon: Nujiwu) li kon pi kon monsuta sewi. nimi Jewe (toki Pon: Yèhwé) li nasin sewi pona. nimi Un (toki Pon: Hun) li telo sijelo loje. nasin sewi ni li sama nasin sewi Jolupa sama nasin sewi Kantonpe sama nasin sewi Santelija.

ona li sewi e jan sewi mute. jan pali sewi li kama jan sewi lon sijelo ona. jan mute li pilin e ni: nasin sewi Otun li ike mute. ona li toki e ni: monsuta li kama lon jan pali sewi.

lon ma Awisi[o ante | o ante e toki ilo]

sitelen Wewe pi jan sewi Pakon Santi

jan Kanse li kama jo e jan pimeja pi ma Apika. ona li tawa e jan ni tawa ma Amelika. jan Kanse li toki e ni: nasin sewi sina li ike mute; o kama jan Katolika. ona li awen pilin wawa e nasin sewi Otun. taso ona li len e nasin sewi Otun kepeken nasin sewi Katolika. ona li toki e ni: mi mute li olin sewi ala e jan sewi ona pi sin ala; mi mute li olin sewi e jan pona pi nasin sewi Katolika. taso ona li kama pilin wawa e ijo pi mute lili tan nasin sewi Katolika. ma Apika la jan sewi Nana Puluku li lon e ma ale e jan sewi Maju e jan sewi Lisa. ma Awisi la sewi Ponte (toki Keyo: Bondyé; toki Kanse: Bon dieu; toki pona: sewi pona) li mama pi ma ale. jan sewi mute li selo ante pi jan sewi wan.

jan pali anpa pi ma Awisi li toki e ni tawa jan sewi mute ona: o weka e mi mute tan jo pi jan Kanse; o pana e wawa tawa mi mute. jan pimeja li kama utala e jan Kanse li anpa e jan Kanse li kama lawa e ma Awisi.

ma Awisi la jan pali sewi li sitelen lon ma tan wile ni: jan sewi li kama. sitelen ni li jo e nimi Wewe. sitelen Wewe en nimi ona li kama tan ma Apika. kin la ona li kama tan kulupu Tawino li kama tan kulupu Alawa tan ma Amelika.