nasin sewi Potesu

tan Wikipesija
o tawa poki nasin o tawa alasa

nasin sewi Potesu (toki Tosi: Protestantismus) li kulupu pi nasin sewi lili mute pi nasin sewi Kolisu. ona li kipisi suli pi nasin Kolisu. nasin sewi Potesu li kipisi tan nasin sewi Katolika lon tenpo poka pi tenpo sike nanpa 1500. ona li kipisi tan ni: jan mute lon ma Elopa li pilin ike tawa pali pi kulupu Katolika. toki pi tenpo ni la, jan li kepeken nimi ni: ante Potesu.

ante Potesu li open lon tenpo sike nanpa 1517. tenpo ni la, jan Masin Lute (toki Tosi: Martin Luther) li pana e lipu sitelen. lipu ni li jo e sitelen pi wile ante ona tawa kulupu Katolika. lipu ni li tawa mute. tan ni la, kulupu Katolika li weka e ona tan kulupu ona. ni li open pi nasin sewi Lute. jan sewi ante li pilin ike li wile ante e nasin Katolika kin. tan ni la, nasin sewi lili ante li kama. kulupu pi nasin sewi ni li nasin sewi Potesu. nimi Potesu li kama tan lipu toki pi pilin ike (Protestation) lon tenpo sike 1529. jan lawa lili pi alasa pi nasin Lute li pana e lipu ni tawa kulupu lawa pi ma suli pi ma Loma sewi tan ni: jan Masin Lute li ike tawa lipu lawa pi ma suli Loma sewi.

nasin sewi Potesu mute li lon. ni mute li nasin sewi Lute li nasin sewi Anapapisa li nasin sewi Ankikan li nasin sewi Ewanseli li nasin sewi Kalin li nasin sewi Papisa li nasin sewi Metosi li nasin sewi Keke.