nasin sewi Potesu

nasin sewi Potesu (toki Tosi: Protestantismus, "toki ante mute la nimi sama mute li lon") li kulupu pi nasin sewi lili mute pi nasin sewi Kolisu. ona li kipisi suli pi nasin Kolisu. nasin sewi Potesu li kipisi tan nasin sewi Katolika lon tenpo poka pi tenpo sike nanpa 1500. ona li kipisi tan ni: jan mute lon ma Elopa li pilin ike tawa pali pi kulupu Katolika. toki pi tenpo ni la, jan li kepeken nimi ni: ante Potesu.

ante Potesu li open lon tenpo sike nanpa 1517. tenpo ni la, jan Masin Lute (toki Tosi: Martin Luther) li pana e lipu sitelen. lipu ni li jo e sitelen pi wile ante ona tawa kulupu Katolika. lipu ni li tawa mute. tan ni la, kulupu Katolika li weka e ona tan kulupu ona. ni li open pi nasin sewi Lute. jan Uli Suwinli (toki Tosi: Huldrych Zwingli) en jan Jowane Kawin (toki Tosi: Johannes Calvin) li pilin ike li wile ante e nasin Katolika kin. taso moka sewi la ona li jo e pilin ante tan jan Lute. tan ni la, nasin sewi lili ante li kama: nasin sewi Suwinli en nasin sewi Kawin. ona tu li sama mute. tan ni la ona li jo e nimi wan kin: nasin sewi Kolisu pi pali ante (toki Tosi: Reformierte (Kirche), "toki ante mute la nimi sama mute li lon"). kulupu pi nasin sewi ni li nasin sewi Potesu. nimi Potesu li kama tan lipu toki pi pilin ike (Protestation) lon tenpo sike 1529. jan lawa lili pi alasa pi nasin Lute li pana e lipu ni tawa kulupu lawa pi ma suli pi ma Loma sewi tan ni: jan Masin Lute li ike tawa lipu lawa pi ma suli Loma sewi. jan Lute en jan Suwinli en jan Kawin li kepeken e nimi ante: "evangelisch" ("pi toki pona pi jan Jesu"). toki ni li suli tawa ona. toki Tosi la tenpo ni kin la jan mute li kepeken e nimi ni. taso toki mute la toki pona kin la nasin sewi Ewanseli li kulupu wan pi nasin sewi Potesu taso.

jan Lute en jan ante li kulupu e ijo suli pi nasin sewi Potesu kepeken nimi "taso": pilin sewi taso, pali olin taso, lipu sitelen (lipu Pipija taso, jan Jesu taso." jan li lanpan e pona sewi kepeken ijo ni taso.

jan ante li pilin e ni: nasin sewi Potesu lon li pali ale ala e ni: pilin sewi en pali olin en lipu Pipija en jan Jesu li suli nanpa wan. tan ni la ona li pali e nasin sewi Potesu ante. mute la ona wile e ni: kulupu jan pi lon wan o lawa. jan lawa lon sewi o lon ala. ken la tan ni la nasin sewi mute pi sama mute li kama lon. mute la ona li pali kulupu pona. kulupu suli tu li lon:

• nasin sewi Ewanseli anu kulupu lon nasin pi lipu Pipija. ona li toki e ni: jan li sitelen e lipu Pipija tan kon sewi. ni la ale lon ona li lon. ijo suli ante li ni: jan pi ona sama li toki: mi wile lon poka sewi. nasin sewi Papisa en nasin sewi Metosi li suli nasin ni. jan ni ale ala li lon nasin sewi sin ni. kulupu Ewanseli li lon insa nasin sewi Lute kin.
• nasin sewi Kalisma. ona la pana (toki Eleni: χάρισμα) tan kon sewi li suli.

nasin sewi Anapapisa li kulupu nasin sewi kin. nasin sewi Meno (toki Inli: Mennonites) en nasin sewi Ute (toki Tosi: Hutterer) li nasin ni. ona li sama mute pi nasin sewi Ewanseli. taso ona li sin ala li lon tan tenpo pi ante Potesu.

nasin sewi Anlikan li jo e tan ante: jan lawa pi ma Inli li wile weka tan jan lawa pi nasin sewi Katolika li pali e nasin sin tan kipisi pi nasin sewi Katolika pi nasin sewi Lute.

nasin sewi Puwitan en kulupu sewi Kuweka kin li nasin sewi Potesu.