sitelen Pa A Mon

sitelen Pa A Mon (toki Mon: Phaj Hauj Hmoob / 𖬖𖬰𖬝𖬵 𖬄𖬶𖬟 𖬌𖬣𖬵 [pʰâ hâu m̥ɔ̃́]) li nasin sitelen pi nasin toki tu pi toki Mon. nasin tu ni li toki Mon Ta li toki Mon Len. jan Son Li Ja (toki Mon: Soob Lwj Yaj / 𖬌𖬤𖬵 𖬘𖬲𖬞 𖬖𖬲𖬤 [ʃɔ́ŋ lɨ̂ jâ]) li pali e ona lon sike suno 1959.

sitelen Pa A Mon Phaj Hauj Hmoob
nimi "Phaj Hauj Hmoob" kepeken sitelen Pa A Mon

nasin

sitelen Pa A Mon li jo e kulupu sitelen tu wan:

• sitelen open
• sitelen kule
• sitelen pini

jan li lukin e sitelen Pa A Mon kepeken nasin ni.

sitelen nimi la sitelen open li nanpa wan. ona li toki e ni: kalama seme pi uta open li lon pini pi nimi ni?

sitelen pini li nanpa tu. ona li toki e ni: kalama seme pi uta pini li lon open pi nimi ni? ona li lon ala la kalama ni li /k/. nasin sitelen nanpa tu wan (o lukin e lipu "tenpo pini") la sitelen 20 pi uta pini li lon, taso kalama 60 li lon. ni la ona li kepeken sitelen lili. sitelen lili ni li sike lili li linja lili. jan li sitelen e ona lon sewi pi sitelen pini.

sitelen kule li sitelen lili li lon sewi pi sitelen open. ona li toki e ni: kule kalama pi nimi ni li seme?

tenpo pini

jan Son Li Ja li pali e sitelen Pa A Mon lon sike suno 1959. tenpo pini la ona li sona ala e nasin sitelen. ona li pilin e ni: jan sewi li pana e sona pi nasin sitelen ni tawa ona tan ni: jan pi kulupu Mon o kama sitelen e toki ona. ni la jan Son Li Ja li pana e sona pi sitelen ni tawa jan ante pi kulupu Mon lon ma Lajo. taso jan utala pi ma Lajo li moli e ona lon sike suno 1971.

tenpo mute la ona li pona e sitelen Pa A Mon. ona li pali e nasin tu tu:

1. sitelen Pa A Mon nanpa wan li suli ike. ona li jo e sitelen 151. nasin nanpa tu li kama la jan li weka e nasin ni.
2. sitelen Pa A Mon nanpa tu li kama lon sike suno 1965. ona li weka e sitelen mute la ona li lili pona.
3. sitelen Pa A Mon nanpa tu wan li kama lon sike suno 1970. ona li pona e nasin sitelen pi kule kalama. nasin sitelen nanpa tu la nasin sitelen pi kule kalama li ike.
4. sitelen Pa A Mon nanpa tu tu li kama lon sike suno 1971. ona li lili e nasin nanpa tu wan.

jan mute li kepeken nasin nanpa tu li kepeken nasin nanpa tu wan.

nanpa sitelen

	nasin nanpa wan	nasin nanpa tu	nasin nanpa tu wan	nasin nanpa tu tu
sitelen pi kalama pini	91	91 (tan 26)	26	13
sitelen pi kule kalama			7 anu 8	8
sitelen pi kalama open	60	19×3	20×3	20×3

toki Mon la jan mute li kepeken ala sitelen Pa A Mon li kepeken sitelen Lasina.

nasin Juniko

sitelen Pa A Mon li kama lon nasin Juniko lon sike suno 2014. ona li lon ma U+16B00–U+16B8F.

sitelen Pa A Mon lon nasin Juniko

	0	1	2	3	4	5	6	7	8	9	A	B	C	D	E	F
U+16B0x	𖬀	𖬁	𖬂	𖬃	𖬄	𖬅	𖬆	𖬇	𖬈	𖬉	𖬊	𖬋	𖬌	𖬍	𖬎	𖬏
U+16B1x	𖬐	𖬑	𖬒	𖬓	𖬔	𖬕	𖬖	𖬗	𖬘	𖬙	𖬚	𖬛	𖬜	𖬝	𖬞	𖬟
U+16B2x	𖬠	𖬡	𖬢	𖬣	𖬤	𖬥	𖬦	𖬧	𖬨	𖬩	𖬪	𖬫	𖬬	𖬭	𖬮	𖬯
U+16B3x	𖬰	𖬱	𖬲	𖬳	𖬴	𖬵	𖬶	𖬷	𖬸	𖬹	𖬺	𖬻	𖬼	𖬽	𖬾	𖬿
U+16B4x	𖭀	𖭁	𖭂	𖭃	𖭄	𖭅
U+16B5x	𖭐	𖭑	𖭒	𖭓	𖭔	𖭕	𖭖	𖭗	𖭘	𖭙		𖭛	𖭜	𖭝	𖭞	𖭟
U+16B6x	𖭠	𖭡		𖭣	𖭤	𖭥	𖭦	𖭧	𖭨	𖭩	𖭪	𖭫	𖭬	𖭭	𖭮	𖭯
U+16B7x	𖭰	𖭱	𖭲	𖭳	𖭴	𖭵	𖭶	𖭷						𖭽	𖭾	𖭿
U+16B8x	𖮀	𖮁	𖮂	𖮃	𖮄	𖮅	𖮆	𖮇	𖮈	𖮉	𖮊	𖮋	𖮌	𖮍	𖮎	𖮏