tenpo musi suno pi nasin sewi Jejuta

ilo suno pi tenpo musi suno

tenpo musi suno pi nasin sewi Jejuta anu tenpo Kanuka (toki Iwisi: חֲנֻכָּה /χa.nuˈka/) li tenpo musi pi nasin sewi Jejuta lon tenpo suno mute. jan li toki e ni: jan pi kulupu Kamona li utala e ma lawa Selekisi pi kulupu Elena la ona li wile sewi sin e tomo sewi suli pi ma tomo Jelusalan kepeken ilo suno. taso ona li jo taso e telo wawa pi tenpo suno wan. wawa sewi la ona li kepeken telo wawa lon tenpo suno mute. ni la jan li pana e pona lon tenpo ni kepeken ilo pi palisa suno mute sama ilo suno pi tomo sewi.

tenpo suno ale pi tenpo ni la jan li suno e palisa wan sin kepeken palisa insa. pini pi tenpo musi la suno li lon palisa ale. sama la jan li musi pi nasin ni: ona li kalama musi li musi kepeken ilo musi pi tawa sike li moku.

nasin sewi la tenpo musi ni li suli mute ala. taso nasin jan la ona li suli tawa jan pi kulupu Jejuta lon ma Mewika lon ma ante mute tan ni: ona li lon tenpo pi tenpo musi.