toki luka

tan lipu Wikipesija
Jump to navigation Jump to search
jan lili li kepeken toki luka Mewika.

toki luka li toki kepeken luka jan. ona li kulupu pi toki mute ante. ma ante la, toki luka ante li lon. tenpo mute la, kulupu pi jan pi kute ala li mama e ona. ona li ken toki mama pi pali ala tan tenpo pini li ken toki sin pi pali jan.

toki luka mama pi pali ala[o ante | o ante e toki ilo]

kulupu pi toki ni li suli. ma mute li jo e toki luka ona tan ni: kulupu pi jan kute lon ma wan li kulupu li toki li mama e toki. ante la, toki li kama tan ma ante anu tenpo pini li kama sin lon tenpo sin, lon ma sin.

toki luka pi ma Mewika (TLpMM) (toki Inli: American Sign Language (ASL)) li suli. jan mute li toki e ona. ona li lon ma Mewika, lon ma Kanata. ona li kama tan toki luka pi ma Kanse. tenpo pini ona li ni: jan Kalate li pana sona tawa jan lili pi kute ala la, ona li wile pona e kama sona la, ona li tawa ma Piten; taso tomo sona pi jan pi kute ala li weka e ona. ni la, ona li tawa ma Kanse li tawa tomo sona pi jan pi kute ala. ona li kama sona e toki luka pi ma Kanse li tawa e ona tawa ma Mewika li pali e tomo sona Kalate pi jan pi kute ala li pana sona e toki luka Mewika. sitelen lili luka la, ona li kepeken luka wan.

toki luka pi ma Piten (TLpMP) (toki Inli: British Sign language (BSL), toki Kinli: Iaith Arwyddion Prydain) li suli. ona li lon ma Juke. toki luka Malita en toki luka pi ma Nusilan en toki luka Alan li kama tan ona li lon kulupu toki sama. jan pi toki luka ale ni en jan pi toki luka pi ma Piten li ken toki li ken sona pona e toki pi ona ante. toki luka pi ma Mewika la, ona li lili li lon ala kulupu toki sama. ni la, jan pi toki luka pi ma Piten en jan pi toki luka pi ma Mewika li ken ala sona pona e toki pi ona ante. jan pi kute ala li mama e toki luka pi ma Piten lon tomo sona pi ma Piten. tomo sona ni li pana sona ala e ona la, jan lili suli lon tomo sona ni li pana sona e ona tawa jan lili lili sin. ni la, ona li kama suli. sitelen lili luka la, ona li kepeken luka tu.

toki luka pi ma ale (TLpMA) (toki Inli: International Sign (IS)) li toki wan ala. jan tu pi toki luka li kama kulupu li toki luka sama ala la, ona li kepeken toki luka pi ma ale. toki luka pi ma ale li kepeken e sama pi toki luka ale e luka ijo mute. tenpo mute la, toki luka pi ma ale li kepeken luka wan taso tan ni: sitelen lili luka pi toki luka mute ante li kepeken luka wan. toki luka pi ma ale li ante lon jan ante. taso tenpo mute la, jan tu pi nasin tu li ken toki.

toki luka sin pi pali jan[o ante | o ante e toki ilo]

kulupu pi toki ni li lili taso. jan mute li pali ala e ni.

luka pona anu toki luka pona (toki Inli: Luka Pona Sign Language, TLpMM/TLpMP: LPSL) li toki luka sin pi pali jan li toki lili. ona li kama sin tan toki luka pona. jan mute li pali lili li pona e ona. jan Olipija li pali mute e ona tan ni: ona li jan pi kute ale ala li wile e toki luka pi toki pona. taso ona li wile ala e ni: ona en toki pona li sama ale ala tan ni: toki luka pi nasin toki pi toki pona li pilin ike lon luka ona. luka pona li weka e nimi 'li' e nimi 'e' li awen e nimi ale ante. nasin toki pi luka pona li ante li pona tawa toki luka. ijo luka li lon. tenpo ni la, jan pi mute lili li toki e ona.

toki pona luka li toki luka lon lipu pu. jan Sonja li mama e ona tan ni:

  • jan li ken toki ala lon tomo sewi.
  • jan li wile powe.
  • jan li alasa lon telo.
  • jan li wile toki musi tawa kulupu pi toki Losupan kepeken nimi luka.

ona li kepeken nasin toki pi toki pona. nimi wan lon toki pona li nimi wan lon toki pona luka. jan mute la, toki pona luka li pilin ike tan nasin toki ona, tan pilin pi nimi luka ona, tan tan ona.

toki luka Kelena li toki luka pi jan Tewi Piteson.

nasin toki pi toki luka[o ante | o ante e toki ilo]

nasin toki pi toki luka en nasin toki pi toki uta li ante.

nimi luka[o ante | o ante e toki ilo]

nimi anu nimi luka anu luka nimi li nimi pi toki luka. ona li kepeken luka. ona ale li jo e luka e lukin e poka e tawa.

luka la, luka pi nimi luka li ken ante mute a. palisa luka ale li sike la, luka li pini li kiwen lukin. palisa luka ale li linja la, luka li open li lukin seli li lukin kasi. ni li luka ante tu taso. luka li ken ante mute a. jan li ante e luka la, kon pi nimi luka li kama ante.

lukin la, nimi luka li lukin tawa poka wan. ken la, sinpin luka li lukin tawa poka. ken la, palisa luka li lukin tawa poka. jan li ante e lukin luka la, kon pi nimi luka li kama ante.

poka la, luka li ken lon poka ante mute. ona li ken lon sijelo li ken lon sewi lawa li ken lon anpa lawa li ken lon ala sijelo li ken lon poka wan li ken lon poka ante li ken lon ante mute a. ni ale la, jan li ante e poka pi nimi luka ona la, kon pi nimi luka ni li kama ante.

tawa la, nimi luka li ken tawa. ona li ken sike li ken tawa sinpin li ken tawa sewi li ken tawa anpa li ken tawa ante. jan li ante e tawa pi nimi luka la, kon pi nimi luka li kama ante.

sinpin en sijelo[o ante | o ante e toki ilo]

toki luka li kepeken luka taso ala li kepeken e sinpin e sijelo. pilin sinpin en tawa uta en tawa lili sijelo li ken pali e kon pi nimi luka.

toki luka pi ma Piten la, sijelo li tawa li lukin tawa poka la, jan li toki luka e toki pi jan ante.

luka ijo[o ante | o ante e toki ilo]

luka ijo li luka sama ijo. ni la, luka li nimi luka ala li sama ijo pi luka ijo ni. ken la, ona li luka ijo ijo li luka ijo kepeken li luka ijo sitelen.

luka ijo ijo anu luka ijo la, luka ijo ni li sama ijo lili. toki luka pi ma Piten en toki luka pi ma Mewika en luka pona la, luka pi palisa luka wan taso (luka wan) li luka ijo jan. ni la, luka wan ni li tawa la, kon pi toki ni li ni: "jan li tawa".

luka ijo kepeken anu luka kepeken la, luka li sama kepeken ilo anu kepeken ijo. ken la, jan pi toki uta li toki e ni: "jan li open e lupa" la, jan pi toki luka li toki ala e nimi luka li toki e luka kepeken pi kepeken lupa li tawa e luka ona sama ni: ona li open e lupa.

luka ijo sitelen anu luka sitelen la, luka li sama ilo sitelen. ni la, ona li ken sitelen e sijelo ijo. ken la, jan pi toki uta li toki e ni: "poki pi kasi kule li sike lon anpa li palisa lon sewi" la, jan pi toki luka li luka sitelen e palisa e sike.

ma luka[o ante | o ante e toki ilo]

luka li lon ma luka lon kon sinpin. kon pi nimi luka sama tu pi ma luka ante li ken ante. luka ijo li tawa la, ona li tawa lon ma luka.

toki luka mute la, nimi luka pi kon 'ona' en nimi luka pi kon 'ni' li kama kon ante kepeken ma luka. jan li toki e nimi luka pi kon 'ni' lon poka wan la, ona li ijo. jan li toki e nimi luka pi kon 'ni' lon poka ante la, ona li ijo ante.