toki sin

tan Wikipesija
o tawa poki nasin o tawa alasa
len pi toki sin li jo e tomo suli pi ma tomo Papili

toki sin li toki tan pali jan anu pali pi kulupu jan. sama ala toki ante la ona li kama tan pali wile.

jan li pali e toki sin tan ijo ante mute. toki sin pi ma ale la jan li wile wan e kulupu jan. toki sin musi la jan li pali e toki tan musi ona. toki nasin la jan li wile kama e nasin lon toki sin.

kulupu pi toki sin[o ante | o ante e toki ilo]

toki sin pi ma ale[o ante | o ante e toki ilo]

toki sin pi ma ale li toki tawa jan pi ma ante mute. tenpo mute la nimi ona li kama tan toki ma ante mute. wile pi mama toki la jan li pini e utala tan sona ala pi toki ante.

toki sin nanpa wan pi ma ale li toki Olapi tan jan Jokan Masin Saja (Johann Martin Schleyer). nimi Volapük li kama tan nimi vol (ma ale) en nimi pük (toki). ni la kon nimi li "toki pi ma ale". nimi mute pi toki Olapi li kama tan toki Inli anu toki Tosi anu toki Kanse. tenpo pini la jan mute li toki e ona. taso toki Epelanto li kama la kulupu pi toki Olapi li kama lili.

toki sin pi suli nanpa wan li toki Epelanto tan jan Luwi Sameno (Ludwik Zamenhof). nimi ona li kama tan toki mute pi ma Elopa. toki pi jan Sameno la jan pi ma Elopa li ken kama sona pona e nasin pi toki Epelanto tan ni: ona li sama nasin pi toki mute tan ma Elopa.

toki lili mute pi toki Epelanto li kama kin. toki Ito li toki lili pi suli nanpa wan tan toki Epelanto.

tenpo pi ilo toki la toki sin mute pi ma ale li kama. toki Kotawa en toki Elepen en toki Pantunija en toki Litepa li toki suli pi tenpo poka. kama suli pi ilo sona li kama e suli pi kulupu toki ni.

toki sin musi[o ante | o ante e toki ilo]

jan li pali e toki sin musi tan musi. tenpo mute la ona li lon lipu anu sitelen tawa.

tenpo mute la jan toki pi sitelen tawa li tan ma ante. ni la jan li pali e toki sin musi pi ma ni ala tawa ona.

jan Son Tokijen (John R. R. Tolkien) li pali e toki sin mute tawa lipu ona. toki Kuwenja (Quenya) en toki Sintalin (Sindarin) li toki sin suli ona. taso toki ante ona li lon kin.

tenpo mute la kulupu pi pali sitelen li wile e toki sin tan jan pali pi toki sin anu jan pi sona toki. jan Makoken (Marc Okrand) li pali e toki Sinan (tlhIngan Hol) tawa jan Sinan pi sitelen musi tawa mun (toki Inli: Star Trek). jan Tewi Piteson (David J. Peterson) li pali e toki Tolaki (Dothraki) tawa sitelen tawa musi pi supa lawa (toki Inli: Game of Thrones).

toki sin nasin[o ante | o ante e toki ilo]

toki sin nasin la jan li wile kama sona e nasin e toki li wile pana e nasin lon toki.

jan So Owe (George Orwell) li toki insa e ni: sina weka e nimi tan toki la jan li ken ala toki insa e ijo pi nimi ni. lipu 1984 ona la ona li toki e toki Nupi (toki Inli: Newspeak). lipu la kulupu lawa li pali e toki sin tan toki Inli tawa ni: ona li ken lawa e jan e toki insa ona.

jan Sen Ku Pon (James Cooke Brown) li pali e toki Lolan. wile ona la toki ni li weka e nasin toki pi kon ante mute. ni la jan ante li ken ala sona ike e toki. mama pi toki Lolan li wile lawa e toki li wile ala e ante pi jan ante. ni la kulupu kulupu "LLG" (toki Inli: Logical Language Group, "kulupu toki pi nasin nanpa pi toki insa") li pali e toki Losupan (la .lojban.) tan toki Lolan. nasin pi toki Losupan li sama toki Lolan. taso kulupu pi jan toki li lawa e toki Losupan. ni li lili e kulupu pi toki Lolan li suli e kulupu pi toki Losupan.

jan Suse Eten Ekin (Suzette Haden Elgin) li pali e toki Latan li pana e ona lon lipu ona Native Tongue. toki Latan la nasin meli li suli sama ala toki ante pi nasin mije.

jan Sonja (Sonja Lang) li pali e toki pona kepeken nasin pona. toki la ona li wile pona e nasin pi toki insa. ona li kepeken kulupu nimi lili li kepeken nasin toki pona. ni la jan li ken kama sona e toki pona kepeken tenpo lili.

toki sin ante[o ante | o ante e toki ilo]

toki sin li mute: