lipu "jan sewi Ese" la tenpo tu la ante li ni

[[ijo:Isis nursing Horus MET 17.190.1641 right3 4.jpg|thumb|sitelen kiwen pi jan sewi Ese. ona li jo e len kiwen lawa pi jan sewi Haho.]]

'''jan sewi Ese''' (toki Masu pi sin ala: ''ꜣst''; toki Nilemenkemi: Ⲏⲥⲉ, ''Ēse''; toki Elena: Ἶσις, ''Îsis'') li jan sewi pi [[nasin sewi Masu]]. ona li lawa e pona silejo e wawa sewi e ken pi kama jan e kon mama meli. mama mije ona li [[jan sewi Ke]]. mama meli ona li [[jan sewi Nu]]. jan sama mute ona li [[jan sewi Wesile]] en [[jan sewi Sete]] en [[jan sewi Nipeho]]. mije ona li jan sewi Wesile. sitelen nimi ona li supa monsi pi jan lawa lon sitelen Masu. jan pi mute lili li toki e ni: nimi pi jan sewi Ese li kama tan nimi pi supa monsi. jan sewi Sete li moli e jan sewi Wesile la jan sewi Ese en Nipeho li alasa e jan sewi Wesile moli li lon e ona tan moli. jan sewi Ese li kama jo e [[jan sewi Olo|jan sewi lili Olo]] li awen e ona.

sitelen ona li [[sitelen Te]]. lukin la sitelen Te en [[sitelen An]] li sama. taso luka pi sitelen Te li anpa. lukin la ona li meli li jo e kasi e sitelen An lon luka. len kiwen lawa ona li supa monsi pi jan lawa. jan sewi Ese en jan sewi Nipeho li alasa e jan sewi Wesile moli li mu tan pilin ike tan ni. kute la mu meli pi pilin ike en mu waso li sama. tan ni la jan li sitelen e jan sewi Ese e jan sewi Nipeho. tenpo la jan li sitelen e ona mute sama waso. tenpo la jan sewi Ese li jo e luka waso tu. jan mute li toki e ni: jan sewi Esi en [[jan sewi Haho]] li sama. tan ni la jan sewi Ese li kama jo e kon mute pi jan sewi Haho. ona li kama jo e ilo pi kalama musi e palisa lawa pi soweli e suno lon lawa.

[[jan Alekanto suli]] li anpa e ma Masu la jan lawa Tolemi mute li lawa la jan Elena en jan Loma li kama pana e olin sewi tawa jan sewi Ese e [[jan sewi Selapi]]. jan Selapi li jan sewi Wesile pi ma Elena. jan lawa mute pi [[nasin sewi Kolisu]] li pini e olin sewi pi jan sewi Ese e olin sewi pi jan sewi Wesile.<gallery>