monsuta jan moli
monsuta jan moli anu monsuta Sonpi (toki Konko: nzambi anu zumbi) li monsuta lon ala. ona li sijelo tawa pi jan moli. monsuta ni li open tan nasin sewi Wotun.
nimi "monsuta Sonpi" li open tan toki Konko. ona li open tan nimi "nzambi" (sewi) anu nimi "zumbi" (ijo sewi). nimi ni li open tawa ma pi pini suno tan tenpo sike 1819 tan jan Lope Sosi. lipu pi ma pi kon nasa (The Magic Island) tan jan Wilijan Sipu li kepeken open e monsuta ni.
monsuta jan moli pi musi pi nasin sona li open tan sitelen tawa tenpo pimeja pi jan moli tawa (Night of the Living Dead) tan jan Jo Lomelo. monsuta ni li moku e sijelo sona. sitelen tawa mute pi monsuta jan moli li lon. sitelen tawa open pi jan moli (Dawn of the Dead) en sitelen tawa kama sin pi jan moli tawa (Return of the Living Dead) li sitelen tawa suli. kalama musi Sila tan jan Make Sakeson li kepeken e monsuta ni.
musi ilo Pajowasato (バイオハザード, Baiohazādo) en musi ilo tomo pi jan moli (House of the Dead) li musi ilo suli tan kulupu pi tenpo sike 1990. kulupu "pini ma tan monsuta jan moli" (zombie apocalypse) li open tan kulupu pi tenpo sike 2000. sitelen tawa jan moli tawa (The Walking Dead) li kulupu sitelen tawa suli.