sina ante e lipu "tenpo kama pi jan Jesu"

[[ijo:Adoration of the shepherds, by Gerard van Honthorst.jpg|thumb|200px|kama pi jan Jesu]]
[[ijo:BERN. Christmas Tree. Bundesplatz. Switzerland. Берн, Швейцария - panoramio.jpg|thumb|200px|kasi suli pi tenpo ni]]
'''tenpo kama pi jan Jesu''' anu '''tenpo Kalikimaka''' anu '''tenpo pana''' li tenpo sewi li tenpo musi pi ma mute lon pini pi mun pini anu lon open pi mun open. tenpo suno ni la jan pi [[nasin sewi Kolisu]] li musi li pana e pona tan kama pi [[jan Jesu]]. tenpo pi awen kama li pini la tenpo kama pi jan Jesu li lon. ona li open e tenpo kama suli pi jan Jesu. jan ante mute pi nasin ante li musi lon tenpo suno ni li musi lon tenpo poka tan [[tenpo pi tenpo musi|tenpo musi ante]].

jan sitelen li toki e kama pi jan Jesu lon lipu toki pi sin pona lon [[lipu sewi Pipija|lipu sewi]]. toki la jan Jesu li kama lon [[ma tomo Peleken]]. jan pi [[nasin Jejuta]] pi tenpo pini li toki e ni: jan lawa li kama tan ma ni li awen e jan tan pakala. [[jan Jose]] en [[jan Malan]] li mama pi jan Jesu. ona li kama lon ma tomo la tomo ala li lon tawa ona. ni la ona li tawa [[tomo soweli]]. jan Malan li pana e jan Jesu lon poki pi moku soweli. kon toki sewi li pana e sona pi kama ona tawa jan pi awen soweli lon ma poka.<ref name=":0">[[jan Alonola]] la, [https://youtu.be/yR61I5QwUSE ''kama pi jan Jesu''], lon ''[[ilo Jutu]].''</ref>

tenpo lon la jan li sona ala e tenpo suno pi kama ona. jan sona li pana e pilin ante mute. kulupu pi nasin sewi li kama musi e ona lon tenpo suno ni tan ni: ona li lon [[tenpo suno pi lili ale]] lon tenpo lete pi ma lete lon nasin pi [[ma Loma pi tenpo pini|ma Loma]]. ni la kulupu sewi ante li musi lon tenpo suno ante.

jan li musi pi nasin ante mute lon tenpo kama pi jan Jesu. suli la jan li pana e ijo tawa jan ante. ni la jan mute pi toki pona li pana e nimi "tenpo pana" tawa ona. ante la jan li kalama musi li lukin e sitelen musi anu pali musi li moku e moku suli li tawa [[tomo pi nasin sewi|tomo sewi]]. sama la jan li kepeken ijo mute pi pona lukin li kepeken len pona mute. suli la jan li pana e kasi pi tenpo pana li pana e poki musi lon anpa ona. ona li len e ona kepeken suno kepeken linja kepeken sike musi. 

tenpo pana la jan musi mute en soweli musi mute li lon toki musi. suli la [[jan Santa]] anu mama pi tenpo pana li kama li pana e ijo tawa jan lili. 

== tan sona ==
<references />

[[kulupu:tenpo musi]]
[[kulupu:nasin sewi Kolisu]]