sina ante e lipu "tonsi"

[[sitelen:Nonbinary Gender Symbol.svg|thumb|sitelen tonsi]]
'''tonsi''' li kulupu pi [[ijo lon]]. [[meli]] en [[mije]] li kulupu ante. 

tenpo mute la kon tonsi li ante tan sijelo ona. tonsi li ken meli pi sijelo mije anu mije pi sijelo meli. ni la tonsi mute li ante e sijelo ona. taso tonsi ale ala li wile ante e sijelo ona. ken la tonsi li meli taso ala li mije taso ala. tenpo mute la nimi tonsi li ante tan nimi ona tan mama ona lon tenpo ona pi kama lon. 
[[sitelen:Transgender Pride flag.svg|thumb|upright=0.5|len sitelen pi jan pi sijelo ante]]

tonsi li nasin olin ala. tonsi ante li olin pi nasin ante e jan pi kulupu ante mute.

kin nimi "tonsi" li jo e kon ni: jan li [[meli sijelo]] tan kama lon. taso ona li [[mije kon]]. anu jan li [[mije sijelo]] tan kama lon. taso ona li [[meli kon]].

==nimi ==
{{o lukin|nimi:tonsi}}
tonsi ante li kepeken nimi ante tawa tonsi ona. tonsi li ken wile ala e ni: jan ante li kepeken nimi "tonsi" tawa ona. toki ante la tonsi li ken wile e ni: jan ante li kepeken nimi ante tawa ona.

[[toki pona]] la nimi "tonsi" li lon [[lipu pu pi jan Sonja|lipu pu]] ala. taso jan mute pi toki pona li sona e ona li kepeken ona. [[jan Sonja]] li toki e ni: "nimi 'tonsi' li pona". kin tawa [[ku]] la ni li nimi pona.

==nasin tonsi==

tonsi ale la ken la ona li ante a selo ona, e sijelo ona. ken la ala. ken la ona li lukin nasa musi e jan lon ni: "jan ni li jo e kon seme?"

tonsi li ken olin e meli, e mije, e tonsi.

===tonsi meli en tonsi mije===

'''tonsi meli''' li meli kon lili. taso ona li meli ala, anu meli lili. '''tonsi mije''' li mije kon lili. taso ona li mije ala, anu mije lili. tonsi meli en tonsi mije li ken [[meli sijelo]], li ken [[mije sijelo]], li ken jo e sijelo ante.

tonsi meli li olin e meli la, ken la ona li pilin e ni: mi [[meli li olin e meli|meli pi olin meli]]. ken la ala. sama la tonsi mije pi olin mije li ken pilin e ni: mi [[mije li olin e mije|mije pi olin mije]]. anu ken la ala.

===tonsi ante===

'''tonsi meli mije''' anu '''tonsi mije meli''' li pilin e ni: mi mije. mi meli. ken la tawa ona li kon tu li jo e suli sama. ken la kon wan li suli. kin kon ante li lili.

'''tonsi pi kon pi mije meli ala''' li jo e kon. taso kon ni li mije ala, li meli ala. ken la kulupu ona la kon ante li lon.

'''tonsi pi kon mute''' li jo e kon tu anu kon mute. tonsi meli mije li tonsi pi kon mute. taso tonsi kon ante li ken lon. '''tonsi pi kon ale''' li jo e kon ale. pona.

'''tonsi pi kon ala''' li jo e kon ala. '''tonsi pi kon lili''' li sama ni. taso lili la ona li jo e kon.

nasin ante mute li lon.

===meli tonsi en mije tonsi===

'''meli tonsi''' li meli. kama lon la ona li mije sijelo. '''mije tonsi''' li mije. kama lon la ona li meli sijelo. kama lon la jan li jo e [[sijelo meli mije]] la, ona li meli, ken la ona li toki e ni: "mi meli tonsi." kin ona li mije la, ken la ona li toki e ni: "mi mije tonsi". anu ken la tawa ona la ona li tonsi ala.

tenpo mute la jan o toki ala e nimi "tonsi" lon mije tonsi, lon meli tonsi.

tenpo mute la meli tonsi li wile meli sijelo. tenpo mute la mije tonsi li wile mije sijelo. taso ona li ken pilin pona lon sijelo ona pi ante ala. anu ken la ona li ante e selo ona, li ante ala e sijelo ona. tonsi la nasin mute li lon.

==len tonsi==
kulupu jan tonsi li jo e len kule mute. len kule nanpa wan li jo e laso loje sewi e walo insa e laso kasi anpa. laso loje sewi li wan e laso mije nasin e loje meli nasin. walo li lon tawa jan pi kulupu ala. laso anpa li lon tawa jan lon kulupu pi nasin ante. len nanpa tu li jo e jelo sewi e walo e laso loje e pimeja anpa. jelo sewi li lon tawa jan pi nasin tu ala. walo li lon tawa jan lon kulupu mute anu kulupu ale. laso loje li wan e kule mije nasin e kule meli nasin. pimeja li lon tawa jan pi kulupu ala. len ante li jo e laso e loje lon selo e walo lon insa. laso li laso mije nasin. loje li loje meli nasin. walo insa li tawa jan pi ante kon.<gallery mode="nolines" widths="200">
ijo:Genderqueer Pride Flag.svg|len tonsi (kon pi nasin ala)
ijo:Nonbinary flag.svg|len tonsi (kon pi nasin tu ala)
ijo:Transgender Pride flag.svg|len tonsi (ante kon)
</gallery>
[[kulupu:nasin jan]]