weka pi kiwen wawa

jan li kepeken kiwen wawa tawa pali e wawa. kiwen li kama kiwen pi wawa lili la, jan li weka e ona. ona li kama weka pi kiwen wawa. jan li ken ala kepeken kiwen la, jan li weka e ona. taso, wawa lili li awen monsuta, li ken pakala e jan. jan li ken ala ala e ona, li wile weka e ona. jan li wile alasa e ma li wile pali e tomo lon ma ni. weka pi kiwen wawa li lon tomo ni.

weka li seme?

ijo lili mute li kama tan kiwen wawa. jan li ken ala lukin e ona. ona li lili mute. taso, ona li tawa linja pi wawa mute. ona li tawa ala e ijo, li ken pakala lili e sijelo jan, e sijelo soweli, e sijelo ale. ijo lili mute li pakala e jan la, ona li sona ala tan ni: jan li ken ala lukin e ijo lili lili lili. taso, jan ni li kama moli. pakala lili mute la, sijelo li kama moli.

jan li kepeken kiwen wawa ni. kiwen wawa li seli e ona sama. kiwen wawa li ken seli e telo. jan li seli e telo kepeken kiwen wawa la, ona li ken pali e wawa linja. telo li seli, li kama ko la, ko ni li tawa sike e ilo suli. ilo li kepeken tawa, li pana e wawa linja.

kepeken pi kiwen wawa li lili e wawa ona. wawa ona li kama lili la, ilo li pana e wawa linja lili. jan li wile e wawa linja mute. ni la, ona li alasa kiwen wawa sin, li weka e kiwen pi wawa lili. weka ni li weka pi kiwen wawa.

kiwen pi wawa lili li awen wawa. weka pi kiwen wawa li awen wawa. ijo lili ike li kama tan ona. ni la, weka ni li ike, li monsuta.

lawa weka

jan mute li pilin e ni: wawa pi kiwen wawa li pona. jan li kepeken ona la, jan li ken pona e ma, li ken pona e kulupu ona, li ken ala e ante suli pi kon ma. taso, jan li kepeken kiwen wawa la, weka ona li lon. weka li ike la, jan li wile alasa nasin ni: jan li kepeken nasin ni, ike weka li pakala ala e jan.

ike weka lon tenpo kama

weka li awen wawa, li awen ike. tenpo kama la, ona li awen ike. kulupu ale pi tenpo ni li lon ala la, ona li awen ike. ni la, jan li wile alasa toki e ike pi weka ni tawa jan ante pi tenpo kama. mi sona ala e ni: jan pi tenpo kama li toki seme? mi sona ala e ni: jan pi tenpo kama li pali e seme, li wile e seme, li sona e seme, li pilin e seme? jan li ken ala toki tawa ona kepeken toki pona, li ken ala kepeken toki uta ante, li ken ala kepeken toki sitelen ante. jan sona li alasa kepeken sitelen pona.

kulupu wan pi jan sona li pali e toki ni. ona la, jan li wile toki e ijo ni tawa jan pi tenpo kama:

lon ni li toki. lon ni li lon wan pi kulupu toki. o kute!

mi wile mute toki e ni. kulupu mi li pilin e ni: kulupu mi li kulupu suli.

lon ni li lon pi pona wawa ala. lon ni li toki ala e pali wawa suli. ijo pona ala li lon ni.

mi pilin e ni: ijo ike jaki li lon ni. toki ni li toki pi ijo ike a!

ike li lon ni... insa la, ike li suli. selo la, ike li lili. insa li lon ni... sijelo ike li sama ni. ike li noka sina.

ike li awen. tenpo mi la, ike li lon. tenpo sina la, ike li lon.

ike li pakala e sijelo sina. ike li ken moli e sina.

sijelo ike li wawa. ona li kon ala, li ko ala, li kiwen ala, li telo ala. ona li wawa taso.

sina pali e ala la, ike li awen, li pakala ala e sina. sina ante e ma ni la, ike li kama, li pakala e sina. o weka e ma ni. o lon ala ma ni.