toki Pewi

toki Pewi (toki Pewi: føroyskt) li toki pi ma Pewi, li lon kulupu toki Kemani. ona li toki lili, li tan toki Nolon. toki Isilan en toki Nosiki la, ona li sama.

tan nimi

nimi Pewi pi toki pona li tan nimi føroyskt (/ˈføːɹɪst/, "toki Pewi") pi toki Pewi. ona li sama nimi ni pi toki Pewi kin: Føroyar (/ˈfœɹjaɹ/, "ma Pewi"), føroyskur (/ˈføːɹɪskʊɹ/, "pi ma Pewi, pi toki Pewi"), føroyingur (/ˈføːɹɪŋkʊɹ/, "jan pi ma Pewi"). toki pona la nimi Powi en nimi Pewija en nimi Powija kin li ken.

nimi føroyskt li tan nimi Føroyar ("ma Pewi"). toki Pewi pi tenpo pini weka la nimi oyar li jo e kon ni: "ona li ma. telo li lon poka ale pi ma ni." jan li sona pona ala e tan pi kipisi nimi Før-. kon ona li ken tan nimi fær ("soweli Ovis aries pi pana len"), li ken tan nimi fjær ("weka").