jan sewi Juno

sitelen kiwen pi jan sewi Juno lon ma tomo Paki

jan sewi Juno (toki Lasina: Iūnō) li jan sewi pi nasin sewi Loma. ona li lawa e kama wan pi jan olin tu e kama pi jan lili li jan lawa pi jan sewi. sitelen ona li waso kule. mama mije ona li jan sewi Satunu. mama meli ona li jan sewi Opi. mije ona en jan sama ona li jan sewi Jupite. jan lili ona li jan sewi Masi li jan sewi Pukan li jan sewi Pelona li jan sewi Juwenta. ona en jan sewi Jupite en jan sewi Minewa li jan sewi tu wan pi nena Kapitolinu. jan li pana e nimi Lekina (toki Lasina: Regina) tawa ona. ni li jo e kon pi meli lawa. nimi ona pi toki Lasina li kama tan nimi iuvenis. ni li jo e kon pi jan sin. nasin sewi Elena la ona li jan sewi Hela. ilo tenpo Loma la nimi pi tenpo mun luka wan li nimi iūnius tan jan sewi Juno.