lawa ma

nasin pi lawa ma ante mute

lawa ma (toki Inli: government) li lawa e ma. jan lawa ma li pali e nasin lawa.

ma mute la, jan li wile pana e mani tawa lawa ma. lawa ma li ken lawa e ma kepeken mani ni.

nasin ante

nasin ante pi lawa ma li ante mute lon nasin ni:

kulupu lawa li lawa tan seme?

• nasin "lawa wan" (toki Elina: αὐτοκρατία) la, jan wan li lawa e ma. ma mute la, ona li moli la, jan lili ona li kama jan lawa.

ma mute pi nasin ni la, jan lawa li toki e ni: lawa sewi li pana e lawa tawa mi.

• nasin "ijo jan" (toki Lasina: rēpūblicā) la, kulupu lawa li kama tan jan.

• nasin "lawa jan" (toki Elina: δημοκρατία) la, jan li ken ante e ni: jan seme li lon kulupu lawa?

lawa ma pi nasin tu ni li ken ante mute. nasin "ijo jan" en nasin "lawa jan" li ken lon ma sama.

sin la, nasin ante li ken lon.

• nasin pi lawa ala (toki Elina: αναρχία) la, jan ala en kulupu ala li lawa e ma. jan ala li anpa tawa jan ante. jan li ken pali e kulupu. taso, kulupu ni li ken ala lawa e jan ante.

kulupu lawa li jo e wan seme?

ma mute pi nasin "ijo jan" la, kulupu lawa li jo e wan 3:

• kulupu pi pali nasin li pali e nasin lawa. nasin lawa li toki e ni: jan li ken ala pali e seme? jan li pali e ona la, ike seme li kama tawa ona? kulupu lawa li pali e seme tawa jan?

• kulupu pi toki nasin li sona e nasin lawa, li lawa e tomo toki pi nasin lawa. jan li pali e ijo ike tawa nasin lawa la, kulupu ni li lukin e pali ona, li toki e ni: pali ni li ike ala ike? kulupu lawa o, pali e seme tawa jan ni? sin la, jan mute li ken toki e ijo ni tawa kulupu ni: "jan ante li pali e ike tawa mi." ni la, kulupu ni li ken lukin e ijo, li ken toki e ni: jan seme li pali pona? kama mute la, kulupu pi toki nasin li ken ante e nasin lawa.

• kulupu pi pali lawa li pali e ijo ante, li jo e wan mute.

• • jan lawa li lawa e kulupu ni. ma mute la, ona li lawa e ma ni ale. ma ante la, nasin lawa pi poki e wawa ona.

• • kulupu jan pi jan lawa li jan anpa pi jan lawa. ona li lawa e nasin ante pi kulupu lawa.

• • kulupu utala pi nasin lawa li pali e ni: ona li lukin e ma, li kama sona e ni: jan seme li pali ike tawa nasin lawa?, li utala anu poki e jan ni.

ma mute la, kulupu pi pali lawa li wile pali e ijo tan kulupu tu ante taso.

sona sin

ma mute la, kulupu lawa li ken toki e ijo ni: "ma ni li ma pi nasin wan". taso, lon la, nasin ona li sama nasin ante. ken la, nasin lawa pi ma li pali ike. ken la, kulupu lawa li kute ala e nasin lawa.

ca - da - de - en - fr - nl - simple - zh-cn -