moku
moku li ijo ni: ona li wawa e sijelo. jan en soweli li pana e moku tawa uta ona la, moku li tawa insa ona. moku li insa la, sijelo li kama wawa.
moku li lon pini pi insa jan la sijelo li pana e ko jaki e telo jelo.
jan li ken moku e ni:
- telo
- kasi (lipu kasi, kili, pan)
- soweli (waso, akesi, kala, pipi)
- pali soweli (sike mama, telo walo, ko suwi)
jan mute li moku e kasi e soweli. jan ante li moku e kasi taso tan ni: ona li pilin e ni: jan li ike tawa soweli li moli e ona.
kulupu jan ante li moku e moku ante.
tenpo pini la jan li alasa e moku taso. tenpo ni la jan ken pali kasi e kasi li jo e soweli tomo. ni li ante e moku jan. tenpo ni la jan li ken moku e telo walo e pan.
jan li seli e moku tan ni: moku seli li pona.
jan lili mute li moku e telo walo pi mama ona. telo ni li pona mute tawa ona.
jan li jo ala e moku e telo la ona li kama ike li ken moli. jan li jo e moku suli mute la ona li kama suli li kama ike li ken moli kin.