musi Pakuman
musi Pakuman (toki Inli: Pac-Man, toki Nijon: パックマン) li musi ilo. ona li pali tan kulupu Namuko lon sike 1980.
musi ni la, sike moku Pakuman li jelo, li lon tomo pi nasin mute, li moku e moku mute, li alasa tan monsuta tu tu. nimi pi monsuta ni li ni:
- monsuta loje li monsuta "Linki." (toki Inli: Blinky.) monsuta Linki li wile tawa sike Pakuman taso. moku lili li awen lon la, monsuta Linki li kama jo e wawa tawa namako.
- monsuta pi loje walo li monsuta "Pinki." (toki Inli: Pinky.) monsuta Pinki li wile tawa sinpin pi sike Pakuman.
- monsuta laso li monsuta "Inki" (toki Inli: Inky.) monsuta Linki li tawa sike Pakuman la, monsuta Inki li wile tawa sike Pakuman tan poka ante.
- monsuta pi loje jelo li monsuta "Ka." (toki Inli: Clyde.) sike Pakuman li weka la, monsuta Ka li wile tawa sike Pakuman. ante la, monsuta Ka li wile tawa poka open pi anpa tomo.
monsuta li luka e sike Pakuman la, sike Pakuman li moli. sike Pakuman li jo e ken tu wan. sike Pakuman li kama jo e nanpa 10,000 la, ona li kama jo e ken namako. sike Pakuman li kama jo ala e ken ale la, musi li pini. taso, moku wawa tu tu li lon. sike Pakuman li moku e ni la, monsuta ale li kama laso telo. monsuta li laso telo la, sike Pakuman li ken moku e ona. monsuta li moku tan sike Pakuman la, ona li kama oko taso.
sike Pakuman li moku e moku ale la, ona li open e supa kama. supa ale li jo e kili. tenpo tu pi supa ale la, kili ni li kama lon tomo pi nasin mute. sike Pakuman li moku e kili ni la, ona li kama jo e nanpa namako.
lon supa nanpa 256 la, musi li kama nasa. poka pini pi tomo li kama sitelen nasa. sina ken anpa ala e ni, tan ni: moku li lili ike lon supa ni.