musi Pokemon Aka en musi Pokemon Mitoli

tan lipu Wikipesija
Revision as of 2024-04-20T07:02:22 by Tesa (toki | ante) (mi pali e lipu. ona li pini ala)
(ante) ← Older revision | Latest revision (ante) | Newer revision → (ante)
Jump to navigation Jump to search
Under construction icon-yellow.svg lipu ni li pini ala li wile e pali. sina ken pini e ona.

musi Pokemon Aka en musi Pokemon Mitoli (toki Nijon: ポケモン 赤・緑, "monsuta poki loje en monsuta poki laso") li musi ilo nanpa wan pi kulupu musi Pokemon. ona li lon ilo Kemupo li kama lon tenpo sike nanpa 1996. kulupu Kemupuliku li pali e ona. kulupu Nintento li pana e ona.

jan musi li lukin e jan tan sewi li lawa e ona. ona li tawa lon ma Kanto tawa ni: ona li wile kama jan soweli wawa. jan li wile utala e jan luka tu wan pi tomo utala, li wile utala e jan tu tu pi wawa mute. kin la, jan li wile kama jo e soweli ale li wile kama sona e soweli ale kepeken ilo ona pi sona soweli.[1] musi ni la, soweli 151 li lon. musi ni la, jan ante li jo e musi la sina ken utala e ona. kin la ona li ken pana e soweli tawa sina.

jan mute la pona pi musi ni li suli a. musi ni li suli mute li pona mute.

musi

nasin

ijo kama

jan musi li lon tomo ona lon ma tomo Masalatan. ona li tawa lon taso lon kasi suli. taso, jan sona Okito Jukinali li pini e tawa jan. ale li sona e jan sona ni. ona li jan pi sona soweli. ona li toki e ken ike pi kasi suli tawa jan musi. kasi suli la, soweli li ken lon li ken utala e sina. jan musi en jan Okito li tawa tomo sona. jan lili kin pi jan Okito li lon tomo. jan lili ni li jan utala tawa jan musi. jan musi en jan utala li ken kama jo e soweli wan tan kulupu pi soweli tu wan. soweli wan li jo e kule kasi. soweli wan li jo e kule telo. soweli wan li jo e kule seli. jan musi li kama jo e soweli la, jan utala li kama jo e soweli ni: kule ona li wawa tawa kule pi soweli pi jan musi. jan musi en jan utala li utala. jan utala en jan musi li utala lon tenpo mute.[2]

jan li tawa ma tomo la, tomo utala li lon. jan musi li wile utala e jan lawa ale pi tomo utala. jan musi li anpa e jan lawa pi tomo utala la, jan lawa li pana e sitelen pi tomo utala ona tawa jan musi. jan musi li kama jo e sitelen ale pi tomo utala la, ona li ken tawa tomo pi jan wawa tu tu. tomo ni la jan pi wawa suli a li lon. jan li tawa ni li utala e jan wawa tu tu. ni la, ona li ken utala e jan pi wawa nanpa wan li kama sona e ni: jan lili pi jan Okito li kama jan pi wawa nanpa wan.[3]

tenpo ale la, jan musi li kama utala e jan pi kulupu Loketo. kulupu ni li ike mute tawa soweli li kepeken ona tawa ijo ike. kin la, ona li lukin weka e soweli pi jan ante. jan musi li pini e ijo ike ale pi kulupu ni.[4][5]

ma

ale pi musi ni li kama lon ma Kanto. ma ni li sama ma Kanto pi ma Nijon. ma ni la ma tomo mute en nasin mute li lon.

pali

jan pali Tasili Satosi li toki e musi ni tawa jan ante pi kulupu Nintento. ona li wile open e pali. pilin jan ante la musi ni li ken pona ala. musi ni li suli ike li pona ala tawa jan mute. taso, jan Mijamoto Sikelu li toki e pona musi. ni la jan pi pilin ike li kama pilin pona tawa musi.[6]

jan Tasili Satosi li wile pali e musi ni tan ni: ona li jan lili la, ona li alasa li kama jo e pipi.[7] taso, ma tomo pi ona lili li kama suli la mute pipi li kama lili. jan Tasili Satosi li lukin e ni: jan lili li musi lon tomo ona taso. ni la, ona li wile pali e musi soweli. soweli ni li sama pipi. pilin ona la jan li ken pana e nimi tawa soweli la soweli li kama suli tawa ona. suli la soweli li ken ala kama pakala li ken ala moli lon utala. ona li kama lape taso lon utala. ni li suli tawa jan Tasili Satosi tan ni: ona li wile ala pana e ijo pi utala ike tawa musi.[8]

jan sitelen Sukimoli Ken li pali e sitelen mute pi musi ni. ona en jan 10 ante li pali e soweli ale. jan Nisita Asuko li pali e soweli Pikasu, e soweli Pusikitane, e soweli Itokake, e soweli Senikame, e soweli ante mute. jan Sukimoli Ken li pini e pali pi soweli mute li sitelen e ona.[9][10]

jan Masuta Junisi li pali e kalama musi.[11]

pilin

musi ni li pona mute a tawa jan mute.[12] suli la ni li pona mute tawa jan: sina en jan ante li ken esun e soweli li ken utala. jan Ke Eli pi kulupu I Ke En li toki e ni: sina kama jan wawa la, sina awen jo ala e soweli ale. sina lukin kama jo e soweli ale la, ni li pali suli li musi mute.[1] jan Pisa Pasolo pi kulupu Kepo la, musi li pona mute. sitelen taso en kalama taso li ike lili. ona li toki e pona ni: sina ken musi Pokemon lon tenpo mute a.[13]

tenpo kama

kulupu li pali e musi Pokemon Ajo. musi ni li sama musi Pokemon Aka/Mitoli. taso kulupu li pona e ijo lili li pana e sitelen sin.

kulupu li pali e musi Pokemon Pikasu. lili la musi ni li sama musi Pokemon Aka/Mitoli. taso ijo mute a li ante. kulupu il pona e ijo mute li pana e ijo sin mute.

tan sona

  1. ↑ 1.0 1.1 jan Craig Harris li toki e ni lon http://gameboy.ign.com/articles/159/159846p1.html. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  2. ↑ kulupu IGN li toki e ni lon http://guides.ign.com/guides/16708/page_113.html. lipu nanpa 113. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  3. ↑ kulupu IGN li toki e ni lon http://guides.ign.com/guides/16708/page_67.html. lipu nanpa 67. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  4. ↑ kulupu IGN li toki e ni lon http://guides.ign.com/guides/16708/page_99.html. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  5. ↑ kulupu IGN li toki e ni lon http://guides.ign.com/guides/16708/page_165.html. lipu nanpa 165. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  6. ↑ jan Alex Harding li toki e ni lon https://www.switchaboo.com/satoshi-tajiri-the-man-behind-pokemon/. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  7. ↑ jan Amadeo Plaza li toki e ni lon https://web.archive.org/web/20070126085524/http://www.ampednews.com/features/182/2. lipu li tan tenpo suno nanpa 26 pi tenpo mun nanpa 1 pi tenpo sike nanpa 2007
  8. ↑ jan Tim Larimer li toki e ni lon https://web.archive.org/web/20071112054158/http://www.time.com/time/asia/magazine/99/1122/pokemon6.fullinterview2.html. lipu li tan tenpo suno nanpa 17 pi tenpo mun nanpa 11 pi tenpo sike nanpa 2007
  9. ↑ ni li tan https://www.pokemon.com/us/pokemon-news/creator-profile-the-creators-of-pikachu/. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  10. ↑ ni li tan https://www.nintendo.co.jp/ds/interview/irbj/vol1/index2.html. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  11. ↑ jan Masuta Junisi li toki e ni lon http://www.gamefreak.co.jp/blog/dir_english/?p=143. mi lukin e lipu lon tenpo suno nanpa 20 lon tenpo mun nanpa 4 lon tenpo sike nanpa 2024
  12. ↑ ni li tan https://web.archive.org/web/20190405000450/https://www.gamerankings.com/gameboy/367023-pokemon-red-version/index.html. lipu li tan tenpo suno nanpa 5 pi tenpo mun nanpa 4 pi tenpo sike nanpa 2019
  13. ↑ jan Peter Bartholow li toki e ni lon https://web.archive.org/web/20100206184212/http://www.gamespot.com/gameboy/rpg/pokemonblue/review.html. lipu li tan tenpo suno nanpa 6 pi tenpo mun nanpa 2 pi tenpo sike nanpa 2010
tan https://wikipesija.org/index.php?title=musi_Pokemon_Aka_en_musi_Pokemon_Mitoli&oldid=33443