pipi len
pipi len (kulupu Awanije (Araneae)) li pipi lon kulupu Awakita (Arachnida). ona li ken pali e len kepeken nena lili lon anpa ona. pipi len li ken suli li ken lili. ona li moku e pipi ante. mute lili pi pipi len li ken moku e soweli lili e akesi lili e kili. kiwen uta ona li ken pana e telo utala.
jan mute li pilin monsuta tan pipi len. taso, lili pi pipi len li ken pakala e jan. pipi pi ken pakala li uta e jan la tenpo mute la ona li moli ala li kama pona sin. moli tan pipi len li nasa li lili. pipi len li wile ala uta e jan. ona li moku ala e jan. ona li uta tan ni taso: ona li pilin monsuta tan jan.
pipi len li pana e pona mute tawa kulupu. ona li moku e pipi ike. waso en akesi li ken moku e ona. ijo wawa li ken tan len ona. misikeke li ken tan telo utala ona.