jan:Kuka

ona o moku e pan suwi!

tenpo suli pini la, jan Son Sa Kuso li toki e ni: tenpo pini la, meli lili lawa suli li lon. jan li toki e ni tawa ona: 'jan lawa o, jan pi mani ala li jo ala e pan!' meli lawa li toki e ni: 'ona li jo ala e pan la, ona o moku e pan suwi!'

ni li ike mute tan ni: meli lawa ni li pana e ni tawa lukin pi jan ale: ona li ken ala sona pona e kon pi toki pi jan nanpa wan, tan ni: ona li sona ala e ni: pilin pi jan pi mani ala li seme?

jan ala li sona e ni: toki ni pi jan Kuso li toki lon ala toki lon. jan li lon li toki e ni: meli lawa pi toki ni li jan Malija Telesa. jan ante li toki e ni: toki ni li powe taso; ona li kama ala lon tenpo pini lon. taso, jan pi mute a li pilin e ni: meli lawa pi toki ni li jan Maki Anwane. jan sona ale li sona pona e ni: isipin ni nanpa pini li powe. taso, jan mute pi sona ala li toki wawa kin e ni.

lon la, jan Maki Anwane li olin pona e jan pi mani ala, li wile li pana e pona tawa ona. ona li lukin e pilin ike pi jan pi mani ala la, ona li pilin ike mute, li wile pali e ijo tawa pona ona.

taso, tan ijo la, jan pi sama ale li sona ala e ni, li pilin e ni: jan Maki Anwane li wile e pona tawa ona sama taso.

tenpo la, jan li ken kute e ni: jan ante li toki e toki ni ('ona o moku e pan suwi!'). ona li toki e ni la, ken mute la ona li wile toki e ni: jan ante li toki e ijo ike sama toki ni.

'jan pi mani ala li jo ala e pan.' jan li toki e ni tawa sina la, o toki ale e nimi 'ona o moku e pan suwi!' o toki e nimi 'pakala! ni li ike mute a! mi ken pali e seme tawa pona ona? ijo ante ala li suli lon poka ni!'