nena kute
nena kute li ijo sijelo wan lon poka lawa. soweli ale en jan ale li jo e nena kute tu. ona li kute e kalama kepeken nena kute.
sina kepeken sona la sina ken pakala e nena kute tawa ijo tu wan. ijo ni li selo pi nena kute en insa pi nena kute en insa mute pi nena kute. sina ken lukin e selo pi nena kute. selo pi nena kute li ken lawa e kalama tawa insa pi nena kute. jan en soweli li tawa la insa pi nena kute li pona. ona li pona tan ni: ona li ken tawa pona li kama ala anpa. ona li jo ala e insa pi nena kute la ona li ken tawa anpa pakala. insa mute pi nena kute li ken kute e kalama. ona li ken ante e kalama tawa pilin.
jan pi kute ala li lon. ona li ken ala kute e toki li kepeken toki luka. jan ni li jo e nena kute. taso nena kute ona li pakala li pali ala.
soweli mute li ken tawa e nena kute ona. jan li ken ala pali e ni.
pipi en kala li jo ala e nena kute. taso ona li jo e ijo kute e linja kute.
jan mute li len e kiwen mani lon nena kute. ona li pali e lupa lon nena kute. tan ni la ona li ken len e kiwen mani.