nena Ululu

nena Ululu tan ilo tawa sewi.

nena Ululu (toki Pitanjala: Uluṟu, toki Inli: Uluru) li sijelo suli pi kiwen ko loje. ona li lon ma Ensi li lon ma Oselija. nena Ululu li ma pi sewi mute tawa kulupu jan Ananku. nimi ona lon toki Inli li ken kiwen pi jan Aje (toki Inli: Ayers Rock) kin. nimi ni li tan jan pi ma Juke la nimi ni li ike tawa jan mute Ananku. lipu pi kulupu lawa pi ma Oselija la nimi ni tu li lon poka. kon nimi pi nena Ululu li ijo ante ala la nena Ululu li nena Ululu (mute la toki pi kulupu Ananku la nimi li jo e kon).

tenpo sike nanpa 1985 la ona li kama ma lawa lili la kulupu jan Ananku en kulupu lawa pi ma Oselija li lawa e ma lili ni.

kiwen

ona li jo e lupa kiwen tomo e lupa telo mute lon poka pi nena anpa. kasi en soweli en waso li moku e telo ni. tenpo telo li kama la telo li telo linja lon kiwen li pali e lupa telo e linja pimeja.

tenpo pini

jan nanpa wan

ilo nanpa tenpo li lukin e kiwen poka pi nena Ululu li pana e sona ni: jan li tawa nena Ululu lon tenpo suno 10,000 pini. sitelen kiwen mute li lon nena. kin la, lupa kiwen la ko walo mute tan seli pali li lon kiwen sewi. jan pi kulupu Ananku li pana e sona tawa jan ante pi kulupu Ananku li kepeken sijelo nena ni.

jan pi ma Elopa

...

nena poka

nena Katatuta tan nena Ululu.

nena Katatuta (toki Pitanjala: Kata Tjuta) anu nena Oka (toki Inli: Mount Olga / The Olgas) li kulupu kiwen sike suli. toki Pitanjala la nimi ona li kon sama e lawa mute. sina ken lukin e ona tan nena Ululu. kon li tawa suli lon insa pi poka ona. nena Katatuta li suli kin tawa kulupu jan Ananku. nena Ululu en ona li lon ma lawa lili sama. kulupu jan Ananku en kulupu lawa pi ma Oselija li lawa e ma lili ni kin.

nena Atela tan nasin tawa nena Ululu.

nena Atela (toki Pitanjala: Atila) anu nena Kona (toki Inli: Mount Conner) li supa kiwen ko suli. jan tawa lukin mute li lukin e ona li toki pakala e ni: ona li nena Ululu a! ona li pali e sitelen. ni li musi tawa jan poka. kulupu jan Ananku li lawa ala e ma pi nena Atila la ona li ma lawa pi ma Ensi.