sitelen tawa Nijan Senesi Ewankelijan

tan lipu Wikipesija
Revision as of 2024-02-23T10:38:40 by Saola (toki | ante)
Jump to navigation Jump to search
nimi Ewankelion


sitelen tawa Neon Kenesis Ewankelion (toki Nijon: 新世紀エヴァンゲリオン) anu Ewankelion anu Ewa li sitelen tawa pi lon ala pi ma Nijon tan tenpo sike 1995―1996. jan Kiteaki Ano tan kulupu Kainaks li pali e ona. jan lili mute tan Ewankelion li kepeken e ilo jan suli mute li utala e ijo sito (toki Nijon: 使徒, "jan pi kama sona"). ijo sito li ijo suli. ona li wile pakala e ma. 26 sitelen tawa lili lon Ewankelion.

nasin sitelen

pakala ma suli anu «pakala nanpa tu» li pakala e ma lon tenpo sike 2000. jan Sinsi Ikali li tawa lon ma tomoTokijo-3 lon tenpo sike 2015 tan mama mije ona jan Kento Ikali. jan Kento Ikali li jan lawa pi kulupu Nelw. kulupu Nelw li lon ma Keoflont. ma Keoflont li lon anpa ma tomo Tokijo-3. jan Sinsi li lon ma tomo Tokijo-3 la ijo site li utala e ma tomo Tokijo-3. jan Sinsi li kepelen ilo jan suli Ewankelion-01 li anpa e ijo sito.

jan Misato Katulaki en jan Asuka Lenkli Solu en jan Lei Ajanami li kama e jan pona pi jan Sinsi. jan Misato li jan utala pi kulupu Nelw. jan Sinsi en jan Asuka li lon tomo pi jan Misato. jan Asuka li jo e ilo jan suli Ewankelion-02. jan Lei li jo e ilo jan suli Ewankelion-00. jan Sinsi en jan Asuka en jan Lei li anpa e 16 ijo sito.

jan Sinsi e ijo sito pini. jan Kento li wile wan ali kon pi jan li pali e ni. jan Sinsi li pilin ike mute. ona li sona e ni: ona li wile lon poka pi jan pona ona.

jan tan Ewankelion

jan tan Ewankelion li pali tan pilin pi jan Kiteaki. ona li jo e ike lon sona ona.

  • jan Sinsi Ikali li jan lili tan Ewankelion. jan li ike tawa ona la ona li pilin ike. pakala e jan li ike tawa ona.
  • jan Lei Ajanami li jan lili tan jan Ewankelion. ona li pilin ike tan ni: ona li sama ijo pi jan Ui Ikali. jan Ui Ikali li mama meli pi jan Sinsi en jan olin pi jan Kento. ona li pilin lili.
  • jan Asuka Lenkli Solu li jan lili tan Ewankelion. ona li sona mute. ona li pilin e ni: ona li lawa.
  • jan Misato Katulaki li jan utala pi kulupu Nelw. ona li musi ala lon pali. ona li musi mute lon tomo ona.

tenpo pini pi pali

tomo pi kulupu Kainaks lon ma tomo Tokijo

jan Kiteaki Ano li pilin ike mute lon tenpo sike 1992 tan ni: sitelen tawa ona li ike tawa jan mute. jan Kiteaki kama pali e Ewankelion lon tenpo sike 1993. kipisi pi sitelen tawa pi jan Kiteaki li lon Ewankelion.

sitelen tawa lili nanpa 1 pi Ewankjelion li lon tenpo sike 1995. sitelen tawa lili nanpa 16 pi Ewankelion li lon la jan Kiteaki li ante e nasin sitelen pi Ewankelion tan ni: kulupu Kainaks li jo e mani lili en jan Kiteaki li pilin ike mute. sitelen tawa lili nanpa 26 li lon tenpo sike 1996.

sona lon Ewankelion

kipisi pi nasin sewi pi jan Jesu en nasin sewi Jejuta en nasin sewi Sinto li lon Ewankelion: jan Atam, jan Ewa, jan Lilit, kasi suli pi lon en mute. ijo sito li sama jan waso sewi. nasin sitelen pi Ewankelion li sama nasin sewi Kapala.

kipisi pi sona pilin en sona jan li lon Ewankelion. jan Lei li jo e pakala sona. jan Sinsi li jo e pilin ante tawa jan mute. jan Lituko Akaki li olin e jan Kento tan ni: ona li lukin e mama mije lon jan Kento. jan mute pi Ewankelion li wile moli.

wawa

jan li jo e selo pi jan Asuka en jan Lei

Ewankelion li pona tawa jan mute. lipu Paste en lipu IGN en lipu Comic Book Resources li toki e ni: Ewankelion li pona mute[1][2][3]. nasin sitelen en jan tan Ewankelion li pona tawa jan[4][5]. taso sitelen tawa lili nanpa 25 en sitelen tawa lili nanpa 26 tan Ewankelion li ike tawa jan[6][7].

sitelen tawa ni li lon tan Ewankelion: sitelen tawa Ewankelion: moli en sin, sitelen tawa pini Ewankelion, sitelen tawa sina wan (ala), sitelen tawa sina ken (ala) tawa, sitelen tawa sina ken (ala) ante en sitelen tawa tu wan tenpo lon tenpo.

Ewankelion li wawa tawa sitelen tawa pi lon ala pi ma Nijon. jan tan Ewankelion li pona tawa jan mute.

kalama musi

jan Siro Sakiu li pali e kalama musi pi Ewankelion. kalama musi pi jan Lutwik Pitkowen en jan Sojan Sepasijen Pake en jan Jusepe Verti en jan So Kantel li lon Ewankelion. kalama musi open pi Ewankelion li «A Cruel Angel's Thesis» (toki Nijon: 残酷な天使のテーゼ). ona li pona tawa jan mute[8][9]. kalama musi pini pi Ewankelion li «Fly Me to the Moon».

tan sona

  1. ↑ jan Jones Ausin en jan Paste Staff li toki e ni lon "The 35 Best Anime of All Time" lon lipu Paste lon tenpo tenpo suno nanpa 15, tenpo mun nanpa 1, tenpo sike 2024.
  2. ↑ ni li tan "Top 25 Best Anime Series of All Time" lon IGN lon tenpo tenpo suno nanpa 22, tenpo mun nanpa 9, tenpo sike 2022.
  3. ↑ jan Kemner Louis li toki e ni lon "30 Best Anime Of All Time" lon Comic Book Resources lon tenpo tenpo suno nanpa 9, tenpo mun nanpa 1, tenpo sike 2024.
  4. ↑ jan Charles McCarter li toki e ni lon "Everywhere FLCL" lon EX Magazine lon tenpo tenpo suno nanpa 23, tenpo mun nanpa 5, tenpo sike 2007.
  5. ↑ jan Roderick Lee li toki e ni lon "Interview: Takagi Shinji" lon EX Magazine lon tenpo tenpo suno nanpa 2, tenpo mun nanpa 2, tenpo sike 2003.
  6. ↑ ni li tan "Otakon Highlights – Evangelion Voice Actors – Aug. 7, 1998" lon Fansview.com lon tenpo tenpo suno nanpa 17, tenpo mun nanpa 6, tenpo sike 2008.
  7. ↑ jan Matthew Vice li toki e ni lon "DStv Pick of the week – Neon Genesis Evangelion : Monday, 15:45, Animax" lon The Times.
  8. ↑ ni li tan "忘れられないアニメソングベスト100 シネマでぽん！Ｓ cinema-game-toy/ウェブリブログ" lon TV Asahi.
  9. ↑ ni li tan "決定！これが日本のベスト" lon TV Asahi.

lipu

tan https://wikipesija.org/index.php?title=sitelen_tawa_Nijan_Senesi_Ewankelijan&oldid=32876