ilo kon

sitelen pi ilo kon mute

ilo kon anu ilo ko (toki Inli:Software) li sona ni: jan anu ilo li pali e ijo lon nasin seme?

kama mute la, jan li toki e "ilo kon" la, jan li toki e ilo kon pi ilo sona anu ilo toki sona. taso, ijo ante li ken ilo kon.

ilo kon jan

jan li wile awen sona e ni: mi pali seme e ijo? jan li ken pali e ni: o sitelen e pali ale lili pi pali suli lon lipu. jan li wile pali e ona la, ona li lukin e lipu, li pali e pali ale sitelen. lipu ni li ilo kon.

ilo kon pi ilo sona

ilo sona la, ilo kon li sona ni: ilo, o pali e ijo seme? o toki tawa jan kepeken nasin seme? o lukin, o ante, o awen e sona seme?

kulupu ante pi ilo kon

ilo kon lawa

ilo kon lawa li ilo kon ni: ona li lawa e ilo sona, li pali e ijo mute ni:

• ilo kon ante li ken pali.
• jan li wile pali e ilo kon, ona li ken kepeken e pali ona.
• (ken) jan mute li ken kepeken e ilo sona wan. taso, ona li ken ala lukin e sona pi ona ante.
• (ken) ilo kon li ken ala lukin e sona pi ona ante. ilo kon wan li ike la, ona li ken ala pakala e ale.

ilo sona Pisi (PC) la, ilo kon lawa mute li lon. ilo kon lawa tu wan ni li suli nanpa wan:

• ilo kon lawa Winto (Windows)
• ilo kon lawa Makinto (macOS)
• ilo kon lawa Linu (Linux)

ilo kon pi pali ijo

ilo kon "LibreOffice Writer" li ken pali e lipu.

ilo kon ni li pona tawa ni: jan li wile pali e ijo kon. ijo ni li ken lipu, li ken sitelen, li ken kalama, li ken ijo ante. jan li ken pali e ijo kon kepeken lipu ni.

ilo kon pi lukin ijo

ilo kon "mpv" li ken pana lukin e sitelen tawa.

ilo kon ni li pona tawa ni: jan li wile lukin e ijo kon.

ilo kon pi pali ijo mute li ken pana lukin e ijo sama. taso, ilo kon ante li ken ala pali e ijo, li ken pana lukin taso e ijo.

ilo kon pi lukin ijo li ken kama jo e ijo tan poki sona, li ken kama jo e ona tan kulupu pi ilo sona.

ilo kon musi

ilo kon "Minetest" li musi pi sitelen tawa. ijo mute la, ona li sama musi Manka.

ilo kon musi, anu musi ilo li ilo kon li pali tawa pana musi taso. musi ni li ken musi pi sitelen tawa, li ken musi pi sitelen toki.

ilo kon pi pona ilo sona

ilo kon ni li pona tawa ni: jan li wile ante e nasin pi ilo sona, e nasin pi ilo kon ante.

ken la, ilo sona li jo e ilo kon jaki mute. jan li wile weka e ona tan ilo sona.

ken la, ilo sona li kama pali ike. jan li wile pona e pali ona.

ante la, ilo kon pi pona ilo sona li ken wan pi ilo kon lawa. ilo kon Plasma en ilo kon pi supa pali ante li pana e "supa pali" tawa ilo kon lawa. jan li ken pali e ijo mute, li ken open e ilo kon ante, li ken lawa e ilo kon lawa kepeken ilo kon ni.

ilo kon pi pali ilo kon

ilo kon "GCC" li sona e toki ilo Si (C). ona li ken pali e ilo kon kepeken lipu nasin pi toki ilo Si. sitelen ni la, ilo kon "GCC" li pali e ilo kon "GCC" sin.

ilo kon ni li pona tawa ni: jan li wile pali e ilo kon sin.

kama mute la, jan li wile pali e ilo kon sin la, jan li wile sona e toki ilo.